Хакеісты менскага „Дынама” абыгралі „Металург” у КХЛ
На гэты момант "Дынама" з 61 балам займае 7-е месца ў Заходняй канферэнцыі КХЛ.
Artykuł Хакеісты менскага „Дынама” абыгралі „Металург” у КХЛ pochodzi z serwisu БЕЛАРУСКАЕ РАДЫЁ РАЦЫЯ.
Хакейнае менскае „Дынама” пераможна завяршыла чарговую хатнюю серыю ў рэгулярным чэмпіянаце КХЛ. Першым лютаўскім супернікам „зуброў” стаў магнітагорскі „Металург”, які падышоў да сустрэчы з „Дынама” з васьмю паразамі ў дзесяці матчах. Госці актыўна пачалі сустрэчу, адкрыўшы лік ужо на шостай хвіліне. Мінімальная перавага „Магніткі” пратрымалася акурат да сярэдзіны другога перыяду, калі вызначыўся форвард „Дынама” Ігар Мартынаў. На старце заключнай трэці „Металург” зноў выйшаў наперад – 2:1, але менчане імгненна выправілі становішча: Мартынаў аформіў дубль, а Нік Мёрклі забяспечыў гаспадарам перавагу. За час, які застаўся, госці адказаць не здолелі, а вось „зубры” закінулі ў чужую брамку яшчэ раз – аўтарам кантрольнага стрэлу стаў Нік Мёрклі. У выніку 4:2 на карысць „Дынама”. Падначаленыя Крэйга Вудкрафта працягнулі серыю з набранымі ачкамі да пяці матчаў. На гэты момант „Дынама” з 61 балам займае 7-е месца ў Заходняй канферэнцыі КХЛ, на ачко апярэджваючы „Северсталь” і на тры – „Спартак”. Далей беларускую каманду чакае гасцявы паядынак супраць другой каманды Захаду „Тарпеда”. Сустрэча ў Ніжнім Ноўгарадзе адбудзецца 4 лютага і стартуе ў 17.00.
„Ювентус” выйшаў у паўфінал Кубка Італіі
У матчы 1/4 фіналу Кубка Італіі па футболе „Ювентус” перайграў „Лацыё” з лікам 1:0 дзякуючы голу Брэмера на 44-й хвіліне гульні. У наступнай стадыі „Ювентус” сустрэнецца з „Інтэрам”. У матчы 17-га тура чэмпіянату Іспаніі па футболе „Рэал” узяў верх над „Валенсіяй” з лікам 2:0. На 52-й хвіліне адзначыўся Асэнсіа, а праз дзве хвіліны Вінісіус Жуніёр.
Хейтынга прызначаны галоўным трэнерам „Аякса”
Джон Хейтынга прызначаны галоўным трэнерам „Аякса”. Тэрмін дзеяння пагаднення з 39-гадовым спецыялістам разлічаны да заканчэння сезона. Хейтынга працуе ў сістэме „Аякса” з 2016 года. Ён змяніў на пасадзе Альфрэда Шродэра, аб звальненні якога было абвешчана 27 студзеня. Амстэрдамскі клуб займае чацвёртае месца ў табліцы чэмпіянату Нідэрландаў, набраўшы 37 ачкоў у 19 матчах. У лідыруючага „Феенорда” 42 балы ў 19 сустрэчах.
Міністры спорту Літвы, Латвіі, Эстоніі і Польшчы выступілі з заклікам да МАК не дапусціць расейцаў і беларусаў да Алімпійскіх гульняў
Міністры спорту Літвы, Латвіі, Эстоніі і Польшчы выступілі з заклікам да Міжнароднага алімпійскага камітэта (МАК) і міжнародных федэрацый асобных відаў спорту забараніць удзел расейскіх і беларускіх спартоўцаў у Алімпійскіх гульнях 2024 года ў Парыжы. „Спробы вярнуць спартоўцаў Расеі і Беларусі на міжнародныя турніры пад прыкрыццём шчыта нейтральнасці з’яўляюцца апраўданнем палітычных рашэнняў гэтых краін і прапаганды, якая імі шырока распаўсюджваецца, калі спорт выкарыстоўваецца як адзін са сродкаў адцягнення ўвагі грамадскасці ад праводзімай агрэсіі”, — цытуе ТАСС заяву міністраў. Да гэтага прэс-сакратар Белага дома Карын Жан-П’ер заявіла, што Злучаныя Штаты выступаюць за допуск атлетаў з Расеі і Беларусі на міжнародныя спартовыя спаборніцтвы ў нейтральным статусе. Сам прэзідэнт МАК Томас Бах раней заяўляў, што спартоўцы з Расеі і Беларусі маглі б прыняць удзел у Алімпійскіх гульнях 2024 года ў Парыжы пад нейтральным сцягам.
Беларускае Радыё Рацыя
Artykuł Хакеісты менскага „Дынама” абыгралі „Металург” у КХЛ pochodzi z serwisu БЕЛАРУСКАЕ РАДЫЁ РАЦЫЯ.