Теракт кечйарна бехкевинчу нохчочо латкъамбина СИЗО-хь лоьраш тIе ца буьту шена аьлла
Теракт кечйарна бехкевина Нохчийчуьра вахархо Висаев Апти Красноярскерчу СИЗО-н лерринчу блокчу воьллина бахьанаш а ца дуьйцуш. Камера чохь шело латторна могуш воцуш ву Висаев, цунна лоьраш тIе а ца буьту, хаамбина цуьнан хIусамнанас Мутаева Iайшас. Iазап дар лору зудчо шен хIусамда чохь латточу камери чуьра хьелаш, иза дузу цо талламхоша Iаткъам барца.
Висаевн хIусамненан информацица, гIуран-беттан 21-чуьра схьа дуьйна ву из спецблок чохь, Iай къаьсстина шийла хуьлу оцу камери чохь. "Изоляторан белхахочо шийлачу аравала бохуш, хьийзаво иза. Ца хуьлчу далахь, рапорт хIоттийна, гIуданан изолятор чу вохуьйтур ву бохуш", - дуьйцу Мутаевас.
Цо бахарехь, хьалхо дуьхьало йира, кхо эцна, СИЗО деана молханаш Висаевна дIадала. Лоьрийн гIоьнах иза ваккхар цуьнга бала бахьар ду, боху Мутаевас. СИЗО-ра лоьрийн декъан куьйгалхочуьнца цхьанакхетар хиллачул тIаьхьа бен аьтто ца белира препараташ цуьнга дIакхачон, тIетуьйхира цо.
Висаевн зудчунна хетарехь, талламхойн лаамца беш бу цуьнан хIусамдена Iаткъам, ша шена бехкаш цуьнга дахкийтархьама. Иштта цо билгалдоккху, цуьнца цхьаьна камери чохь хилла цхьа тутмакх масийттазза ша шена тIе куьйгаш дахьа гIоьртира аьлла: "Даим йа арсаш, йа лезивш керадо цуьнгахь. Дуккха а хадархой ма бу цигахь, лаа ма дац цуьнан кара уьш кхачар. Адвокатера хиина суна цунах лаьцна. Апти валаран кхерамехь ву аьлла хета суна".
Висаев Аптин гIуллакхехула бехкбилларан тешаша хьалхо ца дира оьшу мукIарло. Садыков Радмира даредира бехкевечуьнгахьа, ткъа Газарчиев ИбрахIим Оьрсийчуьра дIавахара, процессе ца вогIуш.
Красноярскан кIоштара ФСБ-н урхалло теллина даьлла Висаевн гIуллакх. Иза бехкево теракт йан нах юкъаийзорна а, иштта цу юкъахь дакъалацарна а, бакъо йоцуш герз латторна а. Велла дIаваллалц чохь яккха хан тоха тарло Висаевна. Цуьнан гергарчара чIагIдо, шайггара долийна гIуллакх ду бохуш.
РогIера оцу гIуллакхна тIехула кхеташо хир ю 2023-чу шеран дечкен-беттан 16-чохь.
Терроризмна тIехула хьалхо хан текхна ву Висаев Апти. Дейтта шой ахшой хан яьккхина цо набахтехь. Нохчийчуьра Лакхарчу кхело 2005-чу шарахь бехкевинера иза бакъо йоцуш герз латторна а, Оьрсийчоьнан ницкъахошна тIелатарна а, теракташ ярна а. Бехкбилларна бухе диллинера хIетахь ша бехкевечо дина мукIарло. Кхел дIахьочу юкъанна Висаевс дIахьедира, тIехь ницкъбина, куьйг яздайтинера шега аьлла.