Մենք ագրեսոր չենք, բայց եթե զգանք, որ կա սպառնալիք, այն կասեցնելու ենք․ Դավիթ Բաբայան
Լեռնային Ղարաբաղի նախագահի մամուլի քարտուղար Դավիթ Բաբայանի խոսքով՝ բազմիցս է ասվել, որ Ադրբեջանը ահաբեկչական երկիր է, որը չի հրաժարվում իր աննորմալ, հայատյաց քաղաքականությունից: Նա ,Tert.am-ի զրույցում խոսելով ղարաբաղաադրբեջանական սահմանին այսօր աճած լարվածության մասին, նկատեց, որ պետք է ավելի կոշտ դիրքորոշում ընտրվի Ադրբեջանի նկատմամբ՝ միևնույն ժամանակ հավելելով՝ իր ասածը չի նշանակում հրաժարվել բանակցություններից:
«Բանակցային գործընթացի սառեցման ու տապալման այլընտրանքը պատերազմն է,- ասաց նա՝ նշելով, որ, իհարկե, սահմանային լարվածության արդյունքում ցանկացած կորուստ մեծ ողբերգություն է հայկական կողմի համար, սակայն որոշ հարցերի պետք է սառնասրտորեն վերաբերենք,- սարսափելի բան է, ամենավատ բանը, որ կարող է կատարվել: Բայց մյուս կողմից պետք է հասկանալ, որ այլընտրանքը պետականության կորուստն է և ցեղասպանությունը: Վերջապես մեր հարևանը Լյուքսեմբուրգը չէ, ում հետ կարելի է պայմանավորվել և հանգիստ սպասել, որ անվերապահորեն բոլոր պայմանավորվածությունները կատարվեն»:
Հիշեցնենք, որ երեկ՝ հոկտեմբերի 22-ին, Ադրբեջանի զինված ուժերը խախտելով վերջերս ԵԱՀԿ Մինսկի խմբի համանախագահների միջնորդությամբ Հայաստանի և Ադրբեջանի նախագահների միջև Ժնևում տեղի ունեցած հանդիպման ժամանակ ձեռք բերված պայմանավորվածությունը, հակամարտ զորքերի շփման գծի հյուսիսարևելյան (Մարտակերտ-Մատաղիս) ուղղությամբ կիրառել են հրետանային զինատեսակներ, հայկական դիրքերի վրա արձակելով ականանետի 5 արկ և «ՍՊԱՅԿ» տիպի մեկ հակատանկային հրթիռ:
Դավիթ Բաբայանի խոսքով՝ երբ խոսում ենք Ղարաբաղյան կարգավորման գործընթացի մասին, պետք է պատկերացնենք մի բան՝ հակամարտության կարգավորումն ընթանում է երկու հարթություններում, առաջինը՝ բուն կարգավորումն է՝ տարբեր հարցերի շուրջ համաձայնության գալը, որը բարդ և երկարատև գործընթաց է Ադրբեջանի հետ բանակցելու պարագայում, երկրորդը՝ համեմատաբար խաղաղության պահպանումն է ու լարվածության մեծացման կանխումը:
«Այստեղ առանցքային դերակատարություն ունեն հայկական զինված ուժերը՝ Հայաստանի Հանրապետության և Արցախի պաշտպանության բանակները, և իհարկե, միջազգային հանրությունը, որը ևս ջանքեր է գործադրում աշխարհում տեղի ունեցող սրընթաց զարգացումների ֆոնին այստեղ խաղաղություն պահպանելու ուղղությամբ »,- ասաց նա:
Արցախի նախագահի մամուլի խոսնակի խոսքով՝ այնուամենայնիվ կարիք կա, որ միջազգային հանրության արձագանքը սահմանում եղած լարվածություններին ավելի կոշտ լինի: «Պետք է Վիեննայի և Սանկտ Պետերբուրգի պայմանավորվածություններն իրականացվեն, որովհետև կարևոր է, որ այդ հարցերն օրակարգից դուրս չլինեն»,- ասաց նա:
Դավիթ Բաբայանը նաև նշեց, որ իրականում Ադրբեջանին ձեռնտու է այս իրավիճակը, քանի որ արցախյան հիմնախնդրի կարգավորման գործընթացը ենթադրելու է քայլեր, որոնք այդ երկրի ղեկավար Իլհամ Ալիևը չի կարողանա անել: «Նույն Ալիևն այնպես է արել, որ Ադրբեջանում Արցախի հիմնախնդրի վերաբերյալ կարծրացած պատկերացումներ լինեն, և հիմա ինչ-որ քայլերի գնալը, կհարվածի նրա վարկանիշին՝ հաշվի առնելով նաև վերջին սկանդալները, «հայտնի «ադրբեջանական լվացքատունը»: Բնական է՝ նա փորձում է բնակչության ուշադրությունը շեղել՝ իր սեփական հարցերը կարգավորելու համար»,- նկատեց նա:
Միջազգային հանրությունից կոշտ դիրքորոշում ակնկալելուն զուգահեռ, Դավիթ Բաբայանի խոսքով, հայկական կողմն, այնուամենայնիվ, պատրաստ է և աշխատում է իր անվտանգությունն ու անկախությունը պահպանելուն:
«Ի դեմս Ադրբեջանի, մենք ահաբեկչական երկրի հետ գործ ունենք, իսկ ահաբեկչության դեմ, նույնիսկ ամենահզոր երկրները չեն կարողանում պայքարել, չնայած շատ քայլեր կասեցնում են, բայց, այնուամենայնիվ, այդ երկրներում ահաբեկչական գործողություններ տեղի են ունենում: Տեսնում ենք՝ ԱՄՆ-ի նման հզոր երկիրը չկարողացավ կանխել Լաս Վեգասի ահաբեկչությունը, Բրյուսելում, Ֆրանսիայում ահաբեկչություններ են լինում․ սա է ահաբեկչության էությունը: Այսպիսի գործողությունների մենք ականատես ենք լինում պարզապես սահմանին: Լայնածավալ պատերազմ չի սկսում, բայց այսպիսի ստոր, կեղտոտ քայլերի է դիմում»,- նշեց նա:
Անդրադառնալով քննարկումներին, ըստ որոնց հայկական կողմը բանակցությունների չպետք է գնա, քանի որ նախկին պայմանավորվածությունները չեն կատարվում, հանդիպումներից հետո էլ լարվածության աճեր են գրանցվում, նշեց․«Պետք չէ ամեն ինչ շահարկել: Շատ հեշտ է կողքից բղավել, քննադատել: Բայց մարդիկ, որոնք այդ մասին խոսում են, իրենց պետքը չեն այդ զոհերը․․․ Ավելի քան վստահ եմ, որ նրանք չեն էլ հետաքրքրվում զոհերի ճակատագրով, չեն էլ կարեկցում ու ցավակցում, բայց, իհարկե, խոսում են, որովհետև մի մասը, ովքեր նման գրառումներ են անում սոցիալական ցանցերում, հայեր չեն՝ ադրբեջանական, թուրքական հատուկ ծառայությունների ներկայացուցիչներ են, մի մասն էլ իրենց քաղաքական շահերի համար են նման քայլի գնում»:
Դավիթ Բաբայանը բանակցություններից և դրանց արդյունքներից դժգոհողներին հարց ուղղեց՝ ո՞րը պետք է լինի այլընտրանքը: «Բանակցությունները վերջացնենք, պատերազմ սկսե՞նք: Դե եկեք պատերազմենք: Այլընտրանքը պատերազմն է․ հարյուրավոր զոհեր: Ի՞նչ անենք, ասեք՝ դիմե՞նք պատերազմի: Եթե պետք է, գնանք, բայց մենք ասում ենք՝ անվտանգության հայեցակարգը, քաղաքականությունը հիմնված է ակտիվ պաշտպանության գաղափարի վրա: Մենք ագրեսոր չենք, բայց եթե զգանք, որ կա սպառնալիք, այն կասեցնելու ենք, ամեն ինչ անելու ենք, որ պաշտպանենք մեր երկիրը, տեղափոխենք ռազմական գործողությունները»,- ասաց նա: