Բավարիայի ֆուտբոլիստ Վիդալը ծեծկռտուքի մասնակից է դարձել Մյունխենի գիշերային ակումբներից մեկում
«Բավարիայի» կիսապաշտպան Արտուրո Վիդալը հերթական անգամ կոնֆլիկտի մասնակից է դարձել` խախտելով հասարակական կարգը:
«Sport1»-ի տեղեկություններով միջադեպը տեղի է ունեցել սեպտեմբերի 17-ի գիշերը Մյունխենի «Crown՛s Club» գիշերային ակումբում, որտեղ չիլիացի կիսապաշտպանը ժամանակն անցկացրել է իր եղբոր և ընկերների հետ:
Գիշերվա երեքին ակումբում ծեծկռտուք է սկսվել: Մի տղամարդ, որը սեպտեմբերի 28-ին այդ մասին հաղորդում է տվել ոստիկանություն, շշով հարված է ստացել գլխին, բայց ոչ Վիդալից կամ նրա ընկերներից: Ֆուտբոլիստը կռվին միջամտել է միայն այդ միջադեպից հետո:
Մյունխենի ոստիկանությունը հաստատել է ծեծկռտուքի փաստը` նշելով, որ հետաքննություն է անցկացնում: «Բավարիան» պաշտոնապես դեռևս չի մեկնաբանել այս տեղեկատվությունը: