2 տարի 9 ամսվա ընթացքում ՀՀ քաղաքացիությունից հրաժարվելու 10 194 դիմում է ստացվել, սակայն թվերը մտահոգիչ չեն. Մնացական Բիչախչյան
2015-ին, 2016 թվականներին և 2017 թվականի վերջին 9 ամիսներին ՀՀ քաղաքացիության դադարեցման համար ՀՀ ոստիկանության Անձնագրային և վիզաների վարչություն է դիմել 10 հզր. 194 քաղաքացի: Նույն ժամանակահատվածում ՀՀ քաղաքացիություն ստանալու համար դիմել է 24հզր. 284 քաղաքացի:
Այս մասին Tert.am-ի հետ զրույցում ասաց ՀՀ անձնագրային և վիզաների վարչության պետ Մնացական Բիչախչյանը:
Հարցին`թվերը մտահոգիչ չե՞ն, քանի որ քաղաքացիության դադարեցման համար դիմումների աճի միտում կա, Մնացական Բիչախչյանը պատասխանեց, որ աճի միտում կա, բայց թվերը մտահոգիչ չեն. «Քաղաքացիություն ստանալն ու դադարեցնելը պրոգրես ապրող գործընթաց է: Բայց այն հանգամանքը, որ աննախադեպ աճ կա, անհանգստացնող է իրավիճակը և այլն, ես որպես մասնագետ այդ կարծիքին չեմ, թվերը մտահոգիչ չեն: Բացի դրանից` հարցին պետք է նայել նաև քաղաքացիություն ստանալու տեսանկյունից: Օրինակ` 2015 թվականի ընթացքում ՀՀ քաղաքացիություն ստանալու համար Անձնագրային և վիզաների վարչություն է դիմել 10 հզր 189 քաղաքացի, 2487 քաղաքացի դիմել է ՀՀ քաղաքացիությունից հրաժարվելու համար: 2016 թվականի ընթացքում 7229 քաղաքացի դիմել է ՀՀ քաղաքացիություն ստանալու, իսկ 3863-ը՝ քաղաքացիության դադարեցման համար»:
Ինչ վերաբերում է ընթացիկ տարվան, Բիչախչյանն ասաց, որ 2017 թվականի 9 ամիսների ընթացքում ՀՀ քաղաքացիությունից հրաժարվելու դիմում է ներկայացրել 3844 անձ, իսկ քաղաքացիություն ստանալու համար դիմում է ներկայացրել 6866 մարդ:
Մնացական Բիչախչյանի խոսքով՝ ՀՀ քաղաքացիությունից հրաժարվելու հիմնական պատճառը որոշ այլ երկրներում երկքաղաքացիության մասին օրենքի բացակայությունն է. «ՀՀ քաղաքացիները դիմում են այլ երկրի քաղաքացիություն ստանալու համար, և այդ երկրից ուղղակի պահանջ է որպեսզի հրաժարվեն այն երկրի քաղաքացիությունից, որի քաղաքացին հանդիսանում են: Ոչ թե նրանք հեռանում են ՀՀ-ից, այլ ուղղակի անձն այլ երկրի քաղաքացիություն ստանալու իրավունք ունի և օգտվում է այդ իրավունքից: ՀՀ քաղաքացիությունից հրաժարվելու 99 տոկոսը պայմանավորված է այլ երկրի քաղաքացիություն ստանալու հանգամանքով»: