Հալեպում 70 գրոհային վայր է դրել զենքերը՝ հաշտեցման ծրագրի շրջանակներում
Սիրիացի քաղաքացիները, որոնց թիվն, ընդհանուր առմամբ, կազմում է 70 մարդ, Հալեպ նահանգում վայր են դրել զենքերն ու հանձնվել են իշխանություններին՝տեղական հաշտեցման մասին պայմանավորվածության շրջանակներում:
Ինչպես հայտնում է РИА Новости-ն՝ հղում անելով սիրիական պետական գործակալությանը, քաղաքացիները ներգրավված են եղել Հալեպ նահանգի արևելյան և հյուսիսային շրջաններում գործող անօրինական զորամիավորումների կազմում: Գրոհայինները հասել են սիրիական բանակի պահակակետերին, որտեղ էլ հանձնվել են իշխանության ներկայացուցիչներին:
Ինչպես նշում է աղբյուրը, հանձնվածներին ժամանակավոր կացարան է տրամադրվել: Բոլոր ստուգումներից հետո նրանց թույլ կտան վերադառնալ իրենց ընտանիքների մոտ:
Սիրիայի նախագահ Բաշար ալ-Ասադը 2015-ին հրաման է արձակել, որի համաձայն Սիրիայի քաղաքացիներ հանդիսացող գրոհայինները զենքը վայր դնելուց հետո կարող են համաներման արժանանալ և վերադառնալ խաղաղ կյանքին: