Եթե աղմուկ է, իհարկե խանգարում է. Երևանի բնակիչները՝ զվարճանքի վայրերի գործունեությունը կանոնակարգելու կառավարության որոշման մասին (տեսանյութ)
Բազմաբնակարան շենքերում և նրանց անմիջական հարևանությամբ գործող գիշերային ակումբների և նման զվարճանքի օբյեկտների գործունեությունը կանոնակարգելու, ինչպես նաև անհրաժեշտության դեպքում այլ վայրեր տեղափոխելու հանձնարարական է հնչեցվել կառավարության ղեկավարի կողմից : Tert.am-ը շրջայց է կատարել Երևանի Փարպեցի փողոցի տարածքում, որտեղ մեկը մյուսին հաջորդում են ժամանցի, զվարճանքի վայրեր, փաբեր, սրճարաններ, պարզելու բնակիչների ու ժամանցի վայրերի սեփականատերերի կարծիքը որոշման մասին:
Փարպեցի փողոցում բնակելի շենքի ներքևում գտնվող բար-արվեստանոցի տնօրեն, նկարչուհի Արուս Սիրադեղյանը Tert.am-ի հետ զրույցում նշեց, որ եթե զվարճանքի վայրն իր գործունեությամբ խանգարում է բնակիչների հանգստին, հատկապես գիշերային ժամերին, ապա կառավարության որոշումն այս մասով տեղին է:
«Եթե խոսքը նրանում է, որ աղմկոտ վայր է, մենք էլ գիտենք որ ժամը 11-ից,12-ից հետո մարդկանց դա խանգարում է։ Բնականաբար, եթե ես էլ շենքում ապրեի, ինձ խանգարեին, կարծում եմ՝ ճիշտ կհամարեի որոշումը: Ուղղակի դա էլ պետք է ունենա իր շարունակական որոշումը, այսինքն` այդ զվարճանքի վայրերը բացողներին պետք է հնարավորություն տան ինչ-որ ձևով, եթե արգելում են, մարդիկ կարողանան շարունակել իրենց բիզնեսը։ Ես ինքս չեմ կարծում իմ տարածքը, իմ ստեղծածը զվարճանքի վայր է, որը կխանգարի բնակիչներին»,-ասաց Սիրադեղյանը:
Tert.am-ի հարցին, թե շենքի բնակիչներից բողոքներ չե՞ն հնչել աղմուկի ու իրենց խանգարելու մասով, բար-սրճարանի տնօրենը պատասխանեց. «Այսքան ժամանակ բողոք չեմ ունեցել բնակիչներից: Եղել է, որ երկու-երեք անգամ կենդանի երաժշտություն է եղել մեզ մոտ, որը մինչև ժամը 12-ն է վերջացել: Այդ կառավարական որոշումներին ես այդքան ընկերավարի չեմ մոտենում, ամեն դեպքում կառավարությունը նրա համար է, որ որոշում կայացնի, բայց արդյո՞ք որոշումը ճիշտ արդյունքի կհասցնի, դա է հարցը»։
Մի շարք զվարճանքի վայրեր աշխատանքը սկսում են երեկոյան ժամերին և շարունակում մինչև ուշ գիշեր: Փարպեցի փողոցի և հարակից փողոցների շենքի բնակիչները Tert.am-ի հետ զրույցում տարբեր կարծիքներ հնչեցրին, մեծ մասամբ նրանք կողմ էին զվարճանքի, աղմկոտ վայրերը շենքերի ներքնահարկերից հանելուն, այլ վայրեր տեղափոխելուն:
«Ես համաձայն եմ, դե եթե աղմուկ է, իհարկե խանգարում է բոլորին, և՛ աղմուկը, և՛ բարձրախոս ջահելությունը, կռվարար, այդ բոլորը խանգարում են մարդկանց հանգստին»,-ասաց բնակիչներից մեկը:
Բնակիչներից շատերը տեղյակ չէին կառավարության որոշումից, բայց կարծում էին, որ ժամանցի վայրերը տեղափոխելու դեպքում պետք է այլընտրանք առաջարկել այդ վայրերի սեփականատերերին, քանի որ իրենք էլ իրենց գործն են անում:
«Ես չեմ ապրում այդ վայրերում, բայց 90 տոկոսով, կարծում եմ, խանգարում է, համենայնդեպս 12-ից հետո բոլորն էլ ուզում են հանգստանալ, քնում են, կան երեխաներ: Կարծում եմ՝ ճիշտ է որոշված, որ կարելի է հանել, չնայած մյուս կողմից էլ, որ նայում ես, մարդիկ դրանով գումար են վաստակում, գործ են անում, համենայնդեպս որոշումը իրենցն է, չեմ կարող ասել՝ ճիշտ է»,-ասաց բնակիչը: