Բասկետբոլիստ Քրիս Յանկու Օսկիյանը՝ Դանիայից կրած պարտության մասին
Բասկետբոլի Հայաստանի հավաքականի խաղացող Քրիս Յանկու Օսկիյանը, ով միայն այսօր առավոտյան էր միացել մեր ընտրանուն Թուրքիայից, Դանիայի հետ անցկացրած խաղից հետո լրագրողների հետ զրույցում կիսվեց տպավորություններով.
«Կարծում եմ՝ լավ խաղացինք: Նախընտրական այս փուլում մենք իրար հետ խաղալու համար բավականաչափ ժամանակ չունեինք: Ինչպես գիտեք, տղաներից շատերն իրենց ակումբներում են: Շատերն էլ ուշ կարողացան միանալ: Համենայն դեպս, կարծում եմ՝ վատ չխաղացինք:
Կարծում եմ՝ վատ արդյունավետություն ցույց չտվեցինք, հատկապես օղակից անդրադարձող գնդակները վերահսկելու առումով: Հանդերձարանում, իհարկե, բոլորիս մոտ տխրություն կար, լավ էինք սկսել խաղն ու ցավալի պարտություն կրեցինք: Վատ խաղ ցույց չէինք տալիս, համենայն դեպս: Բայց, ամեն դեպքում, ուրախ էինք իրար տեսնելու առթիվ»,- նշեց Օսկիյանն ու հայտնեց, որ ինքն այսօր երեկոյան կհանգստանա, իսկ արդեն վաղն առավոտյան կմեկնի Թուրքիա՝ միանալու իր ակումբին: