Siri-ի ստեղծողը քննադատել է Apple-ին՝ հավելվածը չզարգացնելու համար
Siri ամպային անձնական օգնականի ստեղծող Նորման Վինարսկին քննադատել է Apple կորպորացիային իր գյուտը սխալ օգտագործելու և չզարգացնելու համար: Այս մասին հայտնում է Quartz-ը:
Վինարսկին հիմար է անվանել ձայնային օգնականի ժամանակակից տարբերակն ու ասել, որ ինքը չափազանց հիասթափված է կորպորացիայից, որը բոլոր հնարավորությունների առկայության դեպքում վերջին հինգ տարում ոչինչ չի արել այն բարելավելու համար:
Ծրագրավորողը նաև ասել է, որ Apple-ը համընդհանուր ձայնային օգնական է դարձրել Siri հավելվածը՝ անտեսելով իր խորհուրդը: Նրա կարծիքով՝ ծառայությունը պետք էր օգտագործել միայն զվարճությունների և ճանապարհորդությունների ոլորտում:
Siri-ն մտնում է Apple կորպորացիայի iOS, watchOS, macOS և tvOS օպերացիոն համակարգերի մեջ: Այն առաջին անգամ հայտնվել է 2011 թվականին՝ iPhone 4s սմարթֆոնում: