ԵՄ–ը ձևացնում է հայտարարելով, թե Հայաստանի հետ հարաբերությունները երբեք այսքան մոտ չեն եղել, որքան հիմա. Ֆյոդոր Լուկյանով
Եվրոպական միության արտաքին քաղաքականության հարցերով հանձնակատար Ֆեդերիկա Մոգերինի հայտարարությունը, թե Հայաստանն ու Եվրամիությունը երբեք այնքան մոտ չեն եղել, ինչպես այժմ, ձևական, ֆորմալ բնույթի է: Tert.am-ի հետ զրույցում ասաց ռուսաստանցի քաղաքական վերլուծաբան Ֆյոդոր Լուկյանովը՝ շեշտելով, որ շոշափելի զարգացում առաջիկայում չի լինի:
Ըստ Լուկյանովի՝ Հայաստանի և Եվրամիության մտերմությունը հայ-ռուսական հարաբերությունների հաշվին չէ:
Ֆյոդոր Լուկյանովը նշեց, որ Հայաստանի և Եվրամիության միջև նոյեմբերի 24-ին Բրյուսելում ստորագրված համագործակցության մասին համաձայնագիրը որակապես տարբերվում է Ասոցացման համաձայնագրից, որը չստորագրվեց Հայաստանի և Եվրամիության միջև:
«Հայ-եվրոպական հարաբերությունները չեն կարող ազդել Հայաստանի և Ռուսաստանի հարաբերությունների վրա, որովհետև ստորագրված փաստաթղթում չկան նման բաղադրիչներ, որոնք կխոչընդոտեն հայ-ռուսական հարաբերությունների զարգացմանը: Իսկ ինչո՞ւ այդ դեպքում չընդլայնել հարաբերություններն այն ծավալով, որով չենք խանգարում Հայաստանի ստանձնած պարտավորություններին Եվրասիական տնտեսական միության շրջանակներում»,- նշեց վերլուծաբանը:
Վերլուծաբանը նշեց, որ Եվրոպական միությունը յուրահատուկ դրության մեջ է և որոշ իմաստով նման հայտարարությունները ձևական բնույթ են կրում:
«ԵՄ-ն ճգնաժամի մեջ է և ուզում է իր գործընկեր երկրներին լավատեսական տրամադրություններ փոխանցել: ԵՄ-ն թաթախված է իր ներքին խնդիրներով և չեմ կարծում, որ առաջիկա տարիներին վերականգնումից բացի այլ գործառույթներով զբաղվի: Եվրամիությունը չունի հեռահար նպատակներ, ինչպիսին կային 10 տարի առաջ: Չեմ կարծում, թե ԵՄ ու ՀՀ հարաբերություններում շոշափելի զարգացում կարող է լինել»,- շեշտեց վերլուծաբանը:
Ֆյոդոր Լուկյանովն ասաց, որ Եվրամիության ինտրովերտությունն ստիպում է իրենց ցույց տալ, որ իրենք կան, որ իրենք զարգանում են, որ չեն կորցրել իրենց ազդեցիկությունը, ինչը կատարվում է նաև Հայաստանի հետ հարաբերությունների շնորհիվ:
«Մերձավոր Արևելքում Եվրամիությունը չկա, գոյություն չունի, որպես խաղացող ԵՄ-ն այնտեղ անելիք չունի ոչ մի ֆորմատով: Դրա համար այնտեղ, որտեղ կարելի է առանց զոհաբերությունների, առանց լուրջ աշխատանքի ցույց տալ, թե կա ընդլայնում, կա զարգացում, նրանք դա անում են, ինչո՞ւ ոչ: Նրանց շահավետ է ցույց տալ, իմիտացիա անել, որ կա համագործակցություն, կա գործընթաց»,- ասաց Ֆյոդոր Լուկյանովը:
Վերլուծաբանի խոսքով՝ Հայաստան-Եվրամիություն ներկայիս հարաբերությունները չեն կարող ավելի ընդլայնվել, որովհետև երկու կողմերն էլ անդամակցության խնդիր չունեն:
«Հայաստանն աշխարհագրորեն հեռու է Եվրոպական միությունից, Հայաստանը երբեք չի դրել Եվրամիությանն անդամակցելու հարց, ԵՄ-ն էլ հիմա ընդլայնվելու խնդիր չունի: Կան Ուկրաինան, Մոլդովան, Վրաստանը… հերթը Հայաստանին չի հասնի: ԵՄ-ն ընդլայնման տեղ չունի, նրանք փորձում են մոբիլիզացնել իրենց ռեսուրսները, որ հաղթահարեն ներքին խնդիրները: Անգամ Բալթյան պետությունները, որոնց անդամակցությունն օրհասական է, որովհետև հայտնի չէ, թե ինչ կլինի վաղը այս երկրների հետ, լիարժեք անդամակցությունից հեռու են»,- նշեց Լուկյանովը:
Եվրամիությունը, նրա դիտարկմամբ, տարիներ շարունակ կերտել է իմիջ, հեղինակություն՝ չունենալով լուրջ անվտանգային ենթակառուցվածքներ, և հիմա ԵՄ-ն ամեն ինչ անում է, որպեսզի չկորցնի «սուպերապահովված միավորման» կերպարը: «Այս իմիջը քանդվում է և այս իմիջի ամրացման համար նրանք անում են ամեն ինչ: Եթե պետք է ձևացնել, նրանք կձևացնեն, ինչպես արվում է Հայաստանի պարագայում»,- ասաց Ֆյոդոր Լուկյանովը:
Խոսելով Ռուսաստանի մտահոգությունների մասին՝ վերլուծաբանն ասաց, որ ՌԴ-ն քայլեր է ձեռնարկում, երբ այդ հարաբերությունները կարող են դառնալ այդ երկրի և Ռուսաստանի հարաբերությունների որակական փոփոխությանը՝ ի վնաս Ռուսաստանի, ինչպես Ուկրաինայի պարագայում:
«Քանի դեռ մերձեցումը գեղեցիկ ավանդույթների, գեղեցիկ խոսքերի մակարդակում է, Ռուսաստանը լրջորեն չի վերաբերի դրան, թույլ կտա շարունակել այդ խաղը»,- հավելեց նա: