Դա դաս է մեզ համար, որ նման միջոցառումներին պետք է հանգամանորեն պատրաստվել. Արցախի նախարարը` «Եվա» ֆիլմի ցուցադրության արգելքի մասին
Արցախի Հանրապետության մշակույթի, երիտասարդության հարցերի և զբոսաշրջության նախարար Սերգեյ Շահվերդյանը Tert.am-ի հետ զրույցում անդրադարձավ իրանահայ ռեժիսոր Անահիտ Աբադիի «Եվա» ֆիլմը Ստամբուլում Կանանց միջազգային կինոփառատոնի շրջանակում ցուցադրելու արգելքին։ Ֆիլմն առաջացրել է Ադրբեջանի դժգոհությունը, որովհետև այնտեղ Արցախը ներկայացված է Հայաստանի մաս:
Սերգեյ Շահվերդյանը նախ նշեց, որ իրենք շատ ակտիվ աջակցել են «Եվա» ֆիլմի նկարահանմանը Արցախի տարածքում, քանի որ կարևորում են կինոարվեստը, կինոնկարահանումները Արցախում, ինչը նաև նպաստում է Արցախի հանրահռչակմանը:
«Ինչ վերաբերում է «Եվա» ֆիլմի հետ տեղի ունեցածին, ապա ոչ մի զարմանալի, ոչ մի նոր բան չկա դրա մեջ: Ադրբեջանն ամեն տեղ, որտեղ կարողանում է, փորձում է խոչընդոտել Արցախի հետ կապված հարցերում, ոչ մի նորություն չկա դրա մեջ: Մենք չպետք է զարմանանք, որ այդպիսի իրավիճակ է, մանավանդ, որ այն տեղի է ունեցել Թուրքիայի տարածքում: Մենք պարտավոր ենք տեր կանգնել մեր այս ֆիլմին և փորձում ենք այդ առումով լուծումներ տալ»,- ասաց նա:
Դիտարկմանը, թե արդյոք կարիք չկար վաղուց բարձրաձայնել խնդրի մասին, քանի որ Ադրբեջանը ֆիլմի ցուցադրությունն արգելող փորձեր բազմիցս է արել, Արցախի Հանրապետության մշակույթի, երիտասարդության հարցերի և զբոսաշրջության նախարարն ասաց, որ անում են հնարավոր ամեն ինչ, որպեսզի ֆիլմի ցուցադրությունը տեղի ունենա:
«Այնպես չէ, որ միայն այսօր է, որ հաջողել է Ադրբեջանին, ու այնպես չէ, որ Ադրբեջանն ամեն տեղ հաջողում է, դա կախված է բազմաթիվ հանգամանքներից, թե իրենց ջանքերը հաջողությամբ կպսակվեն, թե ոչ: Դա չի նշանակում, որ հայկական կողմը դա իր համար ողբերգության պետք է վերածի, բայց դա դաս է մեզ համար, որ նման միջոցառումներին պետք է երևի հանգամանորեն պատրաստվել»,- ասաց նա և նշեց, որ հայկական կողմն էլ մի հարցում կարողանում է հաջողության հասնել, մի հարցում չի կարողանում: