Երիտասարդ սերունդը պարտավոր է հիշել Հայրենական մեծ պատերազմը և հերոսներին. Արման Ղուկասյան
Մի շարք հասարակական կազմակերպություններ Երևանում ՌԴ գիտության և մշակույթի կենտրոնի հետ համատեղ մայիսի 7-9-ն իրականացնելու են տարբեր միջոցառումներ:
Այսօր լրագրողների հետ զրույցում նման հայտարարություն արեց Հումանիտար զարգացման միջազգային կազմակերպության ղեկավար Արման Ղուկասյանը՝ նկատելով, որ առաջին միջոցառումը կլինի Հաղթանակի զբոսայգում շաբաթօրյակ իրականացնելը: Նրա խոսքով՝ այս և նմանատիպ այլ միջոցառումներով փորձելու են իրենց հարգանքի տուրքը մատուցել հայրենական պատերազմի հայ նահատակներին:
«600.000 հայ է մասնակցել հայրենական պատերազմին՝ բնակչության 20-23 տոկոսը, 100 հազար մարդ Սփյուռքից է միացել հայկական ջոկատներին: Ընդհանուր առմամբ հայ ազգը շատ հերոսներ է ունեցել՝ 106 հերոս, և մոտ 300 000 կորուստ է եղել: Համեմատության համար ասեմ, որ Վրաստանը տվել է 89 հերոս, Ադրբեջանը՝43: Մեր հարևան երկրների համեմատ Հայաստանն ավելի շատ մարշալներ է ունեցել: Հայ ժողովրդի ավանդը հայրենական պատերազմում հաղթանակում մեծ է»,- ասաց նա:
Արման Ղուկասյանը կարծում է, որ երիտասարդ սերունդը պարտավոր է հիշել Հայրենական մեծ պատերազմը և հերոսներին:
Հումանիտար զարգացման միջազգային կազմակերպության փոխնախագահ Ծովինար Կոստանյանն էլ, համաձայնելով գործընկերոջ հետ, հավելեց, որ Հայրենական պատերազմի ժամանակ ոչ միայն ռազմաճակատում են պայքարել հայերը, այլև տեղում առաջնագիծ գնացածներին փոխարինել են կանայք և ծերերը, քանի որ շարունակվում էր տանկերի համար տարբեր դետալների, փամփուշտների արտադրությունը: Նա շեշտեց՝ հայերը Հայրենական պատերազմի բոլոր թեժ կետերի մարտերին են մասնակցել:
«Երիտասարդ սերունդը պետք է գնահատի այդ հաղթանակը, քանի որ պետք է գիտակցել, որ եթե 45 թվին մեր պապերի օգնությամբ չհաղթահարվեր ֆաշիզմը, չի բացառվում, որ մենք չունենայինք արցախյան հերոսամարտը: Որոշ երկրներում այս հաղթանակի իմաստն ու գաղափարը փորձում են խեղաթյուրել, ինչը չի կարելի թույլ տալ»,- ընդգծեց Ծովինար Կոստանյանը:
Երևանում ՌԴ գիտության և մշակույթի կենտրոնի միջտարածաշրջանային համագործակցության բաժնի պետ Սոսե Մարտիրոսյանն էլ տեղեկացրեց, որ մի շարք միջոցառումներ են իրականացվում նաև ՀԿ-ների նախաձեռնությամբ:
«Գեորգիևյան ժապավեններ են բաժանելու: Մայիսի 9-ին Սիրահարների այգում կայանալու է համերգ.մասնակիցները հնարավորություն կունենան հիշարժան օր ունենալ»,- եզրափակեց Սոսե Մարտիրոսյանը: