Դիարբեքիրում ոստիկանությունը ձերբակալել է քրդամետ կուսակցության անդամների ու նրանց աջակիցներին
Թուրքիայի Դիարբեքիր քաղաքում ոստիկանությունը լայնամասշտաբ գործողություն է ձեռնարկել քրդամետ Ժողովրդադեմոկրատական կուսակցության անդամների ու նրանց աջակիցների դեմ, ձերբակալվել է շուրջ 100 մարդ, գրում է «Էվրենսել» պարբերականը:
Նշվում է, որ ձերբակալվածների թվում են կուսակցության՝ Դիարբեքիրի գրասենյակի ղեկավարն ու մի շարք քուրդ լրագրողներ:
Հայտնի է, որ ոստիկանության հատուկջոկատայինները խուզարկություններ են իրականացրել քրդամետ գործիչների տներում՝ ահաբեկչության հետ կապ ունենալու կասկածանքի հիման վրա:
Հիշեցնենք, որ օրեր առաջ «Քրդստանի աշխատավորական կուսակցություն» խմբավորման զինյալների կազմակերպած պայթյունի հետևանքով Թուրքիայի Բաթման նահանգում մահացել էր 7 զինվորական: Դրանից հետո ահաբեկչության հետ կապերի կասկածանքով երկրի ամբողջ տարածքում ու հատկապես Բաթմանում զանգվածայնորեն սկսել են ձերբակալվել քրդամետ բազմաթիվ գործիչներ:
ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը:
Կազմակերպությունը 1978 թվականին հիմնադրել է Աբդուլլահ Օջալանը: