«Եթե լինի հեղափոխության տապալում, ապա դա լինելու է արդարադատություն իրականացնող համակարգի ձեռամբ». Նինա Կարապետյանց
«Պաշտպանության նախարարը, կարծում եմ, ավելի շուտ պետք է հրաժարական տար: Սոցապնախարարը, կարծում եմ, ցույց տվեց, որ ծայրահեղ ծանր պայմաններում շատ հարցեր դուրս էր մնացել իրենց վերահսկողությունից, թեև կատարվում էին բավարար որակով ծավալով աշխատանքներ: Տպավորությունն այնպիսին էր, որ առանձին-առանձին արվում էին ինչ-որ բաներ, բայց ոչ այդ նախարարության ղեկավարման կամ հովանու ներքո: Կարծում եմ՝ ճիշտ որոշում է կայացվել, որովհետև ծայրահեղ ճգնաժամային իրավիճակում կառավարումը հատուկ հմտություններ և գիտելիքներ պահանջող գործընթաց է»,- այս մասին ԳԱԼԱ-ի հետ զրույցում հայտարարեց իրավապաշտպան Նինա Կարապետյանցը՝ անդրադառնալով այսօրվա պաշտոնանկություններին:
Իրավապաշտպանը, անդրադառնալով ԱԻ նախարար Ֆելիքս Ցոլակյանի պաշտոնից ազատմանը, հայտարարեց.
«Իմ կարծիքով՝ ԱԻՆ-ը աշխատեց բավականին լավ թե՛ քովիդի պայմաններում, թե՛ պատերազմական իրավիճակում, բայց հաշվի առնելով, թե այս պաշտոնը ստանձնելուց առաջ ով էր և ինչ շրջապատում էր պարոն Ցոլակյանը, ինձ համար զարմանալի չէ, ավելին, իր այս թիմը լքելը կարող է նաև հուշել, որ փաշինյանական թիմի հեռանալու մասին խոսակցությունները սաստկացել են, և հենց դրա համար էլ ինքը լքել է, որովհետև ԱԻՆ-ը աշխատել է և այն էլ լավ որակով»,- շարունակեց Կարապետյանցը:
«Իրականում բոլորի համար էլ պարզ է, որ միայն դեմքերով, միայն առանձին անհատներով, միայն խոսելով ոչինչ չի փոխվում, և իշխանության հետ դա մեր վեճի թեման էր: Մենք չէինք կարող բացատրել, կամ իրենք չէին ուզում հասկանալ և լսել, որ պետք է ավելի լուրջ և խորքային փոփոխություններ կատարել, այլապես հեղափոխությունը տապալվելու է:
Ես 2,5 տարվա ընթացքում իմ հարցազրույցներում ասել եմ, որ եթե լինի հեղափոխության տապալում, ապա դա լինելու է արդարադատություն իրականացնող համակարգի ձեռամբ: Չբացահայտված, չավարտված քրեական գործերը, դատարանի սաբոտաժը, այս ամեն ինչը բերեց նրան, որ որևէ անգամ նվազագույն արդյունք չկարողացանք արձանագրել թե՛ կոռուպցիայի դեմ պայքարում, թե՛ համակարգերը մաքրելու հարցում:
Պատերազմի ընթացքում ասում են, որ եղել են դավաճաններ, զենքի գնումներից սկսած մինչև ինֆորմացիայի փոխանցում. սա նրա արդյունքն է, որ ներսում եղել են դավաճաններ, որոնց մենք չենք պատժել:
Պատերազմում պարտություն կրելը միայն կախված չէ այս իշխանություններից, սա միայն այս նոր իշխանության մեղքը չէ, կան հարցեր, որոնց լուծումը պետք է տրվեր շատ ավելի վաղուց՝ 26 տարի առաջ, երբ ստորագրվեց հրադադարի պայմանագիրը: Այդ պահից սկսած՝ պետք է լուծվեին բազմաթիվ հարցեր, և կան հարցեր, որոնք 2,5 տարում օբյեկտիվորեն հնարավոր չէ լուծել, բայց որ կա նաև այս իշխանությունների մեղքի բաժինը՝ դա էլ է փաստ:
Իշխանությունը պետք է ընդունի իրենց մեղքի բաժինը և ոչ թե մեղավորներ փնտրի զինվորների և գեներալների մեջ, այլ հենց իրենց մեջ փնտրեն այդ խնդիրները, որովհետև եթե բանակում եղել էր թալան, զենքերի ապօրինի շրջանառություն, բավարար զենքերի չգնում, ապա այդ հարցերի համար պետք էր լուծում գտնեին։ Եթե մի քանի գեներալների, մեծ մասշտաբի խաղացողներին ժամանակին պատժեին, պատասխանատվության ենթարկեին, որևէ մեկի մտքով չէր անցնի գնալ առաջնագիծ և ապատեղեկատվություն տարածել, նահանջի, հետնահանջի հրամաններ տալ:
Այնպես որ, այս իշխանություններն ունեն իրենց մեղքի բաժինը պատերազմի պարտության մեջ, բայց ազնիվ չէ, պարկեշտ չէ, ճշմարիտ չէ բեռը բարդել միայն այս իշխանությունների ուսերին»,-եզրափակեց իրավապաշտպանը:
The post «Եթե լինի հեղափոխության տապալում, ապա դա լինելու է արդարադատություն իրականացնող համակարգի ձեռամբ». Նինա Կարապետյանց appeared first on ԳԱԼԱ.