Խաչատրյանը այն հայ զինված հանցագործներից է, որը 1991 թվականին հարձակվել էր Մեշալի գյուղի վրա․ Ադրբեջանի ԱԳՆ խոսնակը՝ ՀՀ ԱԳՆ խոսնակին
«Հայաստանի ԱԳՆ-ն շարունակում է ապատեղեկատվություն տարածել» (չակերտները - Tert.am)։ Այս մասին Twitter-ում գրել է Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեն։
Ի պատասխան Հայաստանի արտգործնախարարության մամուլի խոսնակ Անի Բադալյանի հայտարարության՝ Հաջիզադեն նշել է, որ «68-ամյա Վագիֆ Խաչատրյանը միջազգային հետախուզման է հայտարարվել Խոջալուի Մեշալիի ցեղասպանությանը մասնակցելու համար» (չակերտները - Tert.am)։
Ըստ Հաջիզադեի՝ րհետաքննությունը պարզել է, որ Խաչատուրյանը այն հայ զինված հանցագործներից է, որը 1991 թվականին հարձակվել էր Մեշալի գյուղի վրա, սպանել 25 ադրբեջանցի, վիրավորել 14-ին և 358 ադրբեջանցու արտաքսել հայրենի հողերից» (չակերտները - Tert.am)։
Խաչատրյանի դուստրը հերքել է այս մեղադրանքները։
Անի Բադալյանն իր թվիթերյան միկրոբլոգում գրել էր․ «Անհանգստացած ենք լուրերից, որ 68-ամյա բուժառուն, որը Կարմիր Խաչի միջազգային կոմիտեի ուղեկցությամբ Լեռնային Ղարաբաղից բուժօգնության համար տեղափոխվում էր Հայաստան, առևանգվել է Ադրբեջանի սահմանապահ ծառայության կողմից ապօրինի տեղադրված անցակետում»։
«Միջազգային մարդասիրական պաշտպանության ներքո գտնվող անձի առևանգումը միջազգային մարդասիրական իրավունքի կոպտագույն խախտում է»,– նշել էր նա:
Ավելի վաղ հայտնի էր դարձել, որ Խաչատրյանը բուժման նպատակով Հայաստան էր տեղափոխվում Կարմիր խաչի միջազգային կոմիտեի ուղեկցությամբ, և Լաչինում տեղակայված անցակետում Ադրբեջանի սահմանապահ ծառայության ներկայացուցիչները նրան տարել են անհայտ ուղղությամբ:
Ավելի ուշ հայտնի է դարձել, որ Ադրբեջանի իրավապահ մարմինները նրան կալանավորել են ու տեղափոխել Բաքու։