თურქეთში მიწისძვრის შედეგად ჩამონგრეული 12 სართულიანი საცხოვრებელი კომპლექსის მეპატრონე აეროპორტში დააკავეს
თურქეთის სამხრეთ-აღმოსავლეთით, ჰატაის პროვინციაში მიწისძვრის შედეგად დანგრეული საცხოვრებელი კომპლექსის Renaissance Residence-ის მფლობელი, სტამბოლის აეროპორტში დააკავეს, როდესაც ქვეყნის დატოვებას ცდილობდა.
ოფიციალური თურქული სააგენტო Anadolu-ს ცნობით, მეჰმედ იასარ ჩოსკუნი საბიჰა გიოქჩენის აეროპორტში მონტენეგროში გამგზავრების მცდელობისას გააჩერეს.
მეჰმედ ჩოსკუნი სტამბოლის გაზიოსმანფაშას რაიონში მთავარი პროკურატურის ბრძანებით დააკავეს. მისთვის ოფიციალურად ბრალი ჯერ არ წაუყენებიათ.
რენესანსის 12 სართულიანი კომპლექსი 250 აპარტამენტისგან შედგებოდა და ჰატაის ანტაკიის რაიონში მდებარეობდა. იგი რეკლამირებული იყო, როგორც ძვირად ღირებული საცხოვრებელი პროექტი, რომელიც სამშენებლო რეგულაციებს შეესაბამება, თუმცა საცხოვრებელი კომპლექსი 7.8 მაგნიტუდის მიწისძვრის შედეგად მთლიანად ჩამოინგრა.
ცნობისთვის, 6 თებერვალს, გამთენიისას, თურქეთში ძლიერი მიწისძვრა მოხდა. 7,8 მაგნიტუდის ბიძგებს მსხვერპლი და ნგრევა მოჰყვა თურქეთსა და სირიაში.
მიწისძვრის ეპიცენტრი თურქეთის ქალაქ გაზიანთეფიდან ჩრდილოეთით, სირიის საზღვრიდან დაახლოებით 90-მდე კილომეტრის მოშორებით იყო. ბიძგები კაიროშიც იგრძნობოდა.
რამდენიმე საათში, თურქეთში კიდევ ერთი ძლიერი, 7.5 მაგნიტუდის სიმძლავრის მიწისძვრა განმეორდა.
თურქეთში მიწისძვრას საქართველოს 4 მოქალაქე ემსხვერპლა.