Бримкулов: "ЖЭБге химиялык цех кереги жок" деген тыянакты кытай тарап чыгарган
Бримкулов 2014-жылы Бишкек жылуулук электр борборун кырсыктан кийин кайра директор болуп дайындалган Андрей Воропаев башкарганын ырастады. Ал эми кырсыкка негизги күнөөкөрлөрдүн бири катары иштен алынган мурдагы директор Нурлан Өмүркул уулу башкы инженерлик кызматты аркалаган.
Бишкек ЖЭБинин мурдагы директору кырсыктын чоо-жайын иликтеген мекеме аралык комиссия туура эмес бүтүм чыгарып, кимдир бирөөнүн кызыкчылыгын коргогонун билдирип чыккан. Кырсыкка ЖЭБдин азыркы башчысы, окуя маалында өзүнүн техникалык маселелер боюнча орун басары болуп иштеген Андрей Воропаевдин да түздөн-түз жоопкерчилиги бардыгын айткан. Воропаев буга комментарий бере элек.
Быйыл 26-январда ЖЭБдеги суу бөлүштүрүүчү жабдык иштен чыгып, -20 градустан ашкан катуу суукта абоненттерге беш күн бою жылуулук берилген жок. Бул кырдаал жарым жыл мурун модернизацияланган жылуулук борборуна карата сын-пикирлерди күчөтүп, Кытай берген 386 миллион доллардын максаттуу сарпталганы суроо жараткан. Бишкек жылуулук борборун модернизациялоо иши 2014-жылдын апрелинде башталып, былтыр августта аяктаган. Ага кеткен 386 миллион долларды Кытайдын Экспорт-импорт банкы насыя катары берген. Модернизация иштерин TBEA компаниясы жүргүзгөн. (NT)