Кабулдагы кош жардыруу үчүн “Ислам мамлекети” жоопкерчилик алды
Кабулда 30-апрелде эртең менен болгон кош жардыруу 20дан ашык кишинин өмүрүн алган.
Арасында "Эркин Европа/Азаттык" радиосунун ооган редакциясынын эки журналисти бар. Маркумдардын бири - Абдулла Хананзай оператор болуп иштеген. Сабавун Какар көбүнчө радикалдуу исламчылардын кол салуулары болгон жерде материалдарды даярдап турган.
Теракттын дагы бир курмандыгы Мухаррам Дуррани “Азаттыктын” ооган кызматында 15-майдан тарта иштей баштамак. Аялдарга арналган берүүлөрдү даярдаган Маххарам Кабулдагы университетте окуган.
"Эркин Европа/Азаттык" радиосунун президенти Томас Кент маркумдардын үй-бүлөлөрүнө терең кайгыруу менен көңүл айтты.
Кол салууда 50гө чукул киши жарадар болду.
Ооган бийлигинин маалыматына караганда, мотоцикл миңген жанкечти атайын кызматтын кеңсеси жайгашкан имараттын жанында өзүн-өзү жардырып жиберген. 20 мүнөттөн кийин журналисттер кол салууну чагылдырууга чогулган жерде экинчи бомба жарылган.