Прокуратура: Мелис Калыков кыйноого кабылган эмес
- Мамажакыпов экөө машина менен баратканда ортосунда уруш чыккан. Машинени токтотуп, сыртка чыгып мушташа баштаганда Калыков мылтыгын көтөрүп чыккан. Мелис Калыков "мылтык кокустан атылып кетти" деп көрсөтмө берген. "Тамеки чегип жатканда кийип жүргөн бушлаты өрттөнүп, кийин Мамажакыповдун бушлатына өрт өтүп кеткен" деп көрсөтмө берген. Ошол эле учурда ал катуу мас абалында болчу. Башка күбөлөрдүн берген көрсөтмөлөрүнүн жана иштин материалдарын негизинде Калыковдун күнөөсү толугу менен далилденди, - деди Башкы прокуратуранын өкүлү Замир Бейшекеев.
Бейшекеев шектүү көрсөтмө берген учурда эч кандай кыйноого кабылбаганын жана анын көрсөтмөсү толугу менен камерага тартылып алганын айтып, "мени кыйнашты" деген сөздөрдү жоопкерчиликтен качуу аракети катары сыпаттады.
Баткен облусунун мурдагы прокурору, 43 жаштагы Анарбай Мамажакыповдун киши колдуу болгон сөөгү 18-ноябрда Баткендеги тоо арасынан табылган. Окуя боюнча Кылмыш-жаза кодексинин “Киши өлтүрүү” беренеси менен иш козголуп, тергөө иштери уланууда. (KR)