Красногорскиде 50 чакты тажик мигранты кармалганы маалымдалды
Орусиянын жер-жеринде тажик мигранттарын кармоо, басым-кысымга алуу уланууда.
Бул тууралуу маалымдаган “Озоди” радиосу 1-июнда болгон окуянын видеосун жарыялады. Маалыматка караганда, Красногорск шаарындагы курулуштардын биринде 50 чакты тажик жараны кармалды.
Социалдык тармактардын колдонуучулары редакцияга салган дагы бир видеодо полиция көмкөрөсүнөн жерде жаткан мигранттарды сабаганын көрүүгө болот. Видеону тарткан адамдар өздөрүн тажик мигранттары деп атаган жана ал окуялар акыркы күндөрдө Москва шаарында жана айланасында болгонун жазышты. Алардын айтымында, бир нече мигрант жараат алды.
19-майда Комсомольск-на-Амуре шаарындагы университетте окуган жуздөн ашуун тажик студентти ОМОНдун аскерлери сабаган. Студенттер тартип коргоочулар жатаканасына кирип келип, тажиктерди бутага алганын айтып беришкен. Тажикстандын Москвадагы элчилиги ошондо 10 студент жабыркаганын маалымдаган.
Өткөн жумада тажик Тышкы иштер министрлиги Орусиянын Дүйшөмбүдөгү элчиси Семен Григорьевди чакырып, тажик жарандарынын жапырт кармалып жатканына тынчсыздануусун билдирген.
Орусия бийлиги мигранттарга күч колдонуу учурларынын көбөйүшүн түшүндүргөн жок.