Уапсени 10 демонстранти на протести во Бристол
Илјадници демонстранти се собраа во центарот на градот, игнорирајќи ги рестриктивните мерки, во знак на протест против нацрт-законот што се дискутира во парламентот. Доколку законот биде усвоен, на полицијата ќе и се дадат поголеми овластувања за забрана на улични протести, пренесува агенцијата Ројтерс.
„Десет лица се уапсени за различни дела, вклучително и насилно однесување, напад врз работник на Службата за вонредни ситуации и поседување на наркотични средства“, изјави полицискиот службеник Марк Ранакриз.
Тој додаде дека тројца од уапсените се приведени во рамки на истрага за претходни немири во Бристол.
Пред помалку од седум дена во Бристол, двајца полицајци беа сериозно повредени, а најмалку две патролни возила беа запалени.
Новиот полициски закон ќе одобри ограничување на времето, но и звучно ограничување за време на протести, што предизвика негодување кај активистите, особено по жестокиот одговор на безбедносните сили за време на бдеењето организирано во Лондон за убиството на Сара Еверард на 13 март, пренесува Ројтерс.
Полициски службеник е обвинет за киднапирање и за убиство на Еверард.
Предлог-законот беше подготвен пред смртта на Еверард и опфаќа голем дел од безбедносниот сектор, како и обезбедувањето на протестите.