Европарламентот им го укина имунитетот на двајца пратеници во истрагата за мито

Европскиот парламент денеска со големо мнозинство гласаше за одземање на имунитетот од гонење на двајца пратеници по барањето на белгиските истражители да ги испрашаат во врска со корупцискиот скандал со пари за влијание. Парламентот ги поддржа предлозите за укинување на имунитетот на Италијанецот Андреа Козолино и Белгиецот Марк Тарабела. Тарабела и Козолино, преку нивните адвокати, негираа дека сториле нешто лошо и рекоа дека се подготвени да одговорат на прашањата на белгиските власти.

Каили суспендирана во Европскиот Парламент по коруптивниот скандал

Грчката пратеничка во Европскиот парламент Ева Каили, италијанскиот поранешен пратеник во Европскиот парламент Пјер Антонио Панцери, заедно со уште двајца се во белгиски притвор соочени со обвиненија за корупција, перење пари во врска со наводните плаќања од Катар и Мароко. Панцери се согласи да работи со белгиските власти во замена за намалена казна. Катар и Каили негираа дека сториле нешто лошо. Мароко се пожали на „судско вознемирување“ по истрагата за мито, која беше наречена „Катаргејт“. Партнерот на Каили, Франческо Џорџи, кој исто така е во притвор, признал дека земал мито и рече дека се сомнева оти Тарабела добивал пари од Катар, според извор близок до истрагата.