د کندز پولیسو د نشه یې موادو د قاچاق په تور ۷ تنه نیولي
د کندز له جنايي جرمونو سره د مبارزې مدیر سمونوال ویس الدین تلاش له ازادي راډیو سره په خبرو کې وویل، دا کسان د کندز ښار په اړوندو ناحیو او شااوخوا سیمو کې د پولیسو له خوا نیول شوي او یو تن چې غوښتل یې څلور کیلو ګرامه نشه يي مواد له تخار ولایت څخه کابل ته انتقال کړي، د پولیسو له خوا نیول شوی دی.
نوموړی زیاتوي:
"دې ۷ کسانو د نشه يي موادو په قاچاق، تهدیدونو او وسله والو غلاوو کې لاس درلود او د عین الله په نوم د مزار شریف یو تن چې څلور کیلو ګرامه نشه يي مواد یې له تخار ولایت څخه قاچاق کول، پولیسو نیولی دی."
د ښاغلي تلاش په وینا، د نیول شویو کسانو دوسیې د لازیاتو څېړنو په خاطر عدلي او قضايي ارګانونو ته لېږل شوې دي.