چارواکي: د پکتیا په ځاځي اریوب کې ۱۱ وسله وال ووژل شول
د پکتیا د امنیې قوماندانۍ ویاند سردار ولي تبسم ازادي راډیو ته وویل چې د دوی د کشفي معلوماتو له مخې، یاد وسله وال چې د قاري احسان او قاري زوبیر د ګروپونو کسان وو، نن د چارشنبې په ورځ ماسپښین نېږدې یوه بجه د غوڅ ملاتړ ځواکونو په هوايي بریدونو کې وژل شوي دي.
سردار ولي تبسم زیاته کړه چې یادو وسله والو به د ځاځي اریوب ولسوالۍ په مربوطاتو کې، د افغان ځواکونو خلاف بریدونه ترسره کول.
دی وایي:
"دغه ګروپونه د قاري احسان الله او قاري زبیر په نومونو یادېږي چې د ځاځي اریوب ولسوالۍ اړوندو سیمو کې به يې ترهګریز فعالیتونه ترسره کول چې نن ماسپین مهال د غوڅ ملاتړ د هوايي ځواکونو له خوا په نښه شول او له منځه ولاړل."
د پکتیا د امنیې قوماندانۍ ویاند وویل چې په دې بریدونو کې له وسله والو پرته افغان ځواکونو او ملکي وګړو ته زیان نه دی رسېدلی.
تر اوسه کومې وسله والې ډلې په دې اړه رسنیو ته څه نه دي ویلي.