په پاکستان کې د تحریک انصاف ګوند یو کاندید ووژل شو
پولیس وايي، د اکرام الله ګنډاپور پر موټر دا برید د یکشنبې په ورځ د ډېره اسمعیل خان په کولاچي سیمه کې هغه وخت شوی چې ګنډاپور د انتخاباتي کمپاېن په لړ کې یوې غوندې ته روان و.
که څه د لومړنیو راپورونو له مخې، په دغه برید کې اکرام الله ګنډاپور سخت ټپي شوی و، خو پاکستاني رسنۍ د ډېره اسمعیل خان د امنیتي او روغتیايي چارواکو په حواله وايي چې اکرام الله ګنډاپور په روغتون کې د ور اوښتو ټپونو له امله ساه ورکړه.
په دغه برید کې پر ګنډاپور سربېره د هغه ډرېور هم وژل شوی دی.
د پاکستان تحریک انصاف مشر عمران خان او ددغه ګوند نورو چارواکو په خیبر پښتونخوا کې پر خپل کاندید برید غندلی او دا یې بزدلانه عمل بللی دی.
بل خوا بیا په بنو کې د جمیعت علمای اسلام (ف) پر یوه سیاستوال او د پاکستان په پارلماني ټاکنو کې د اسامپاله ګوندونو د اتحاد (متحده مجلس عمل) کاندید اکرم خان دراني هم برید شوی، خو نوموړی پکې روغ وتلی دی.
دا په روانه میاشت کې پر اکرم خان دراني دوهم برید دی.
د یادونې وړ ده چې په خیبر پښتونخوا کې پر دغو کاندیدانو د برید مسؤلیت لا تر دې دمه کومې وسله والې ډلې نه دی منلی.