د افغانستان د لوی ائتلاف غړو د کندهار د ټاکنو ولایتي دفتر وتاړه
ددغه ائتلاف غړي وایي، حکومت د شفافو ټاکنو د ترسره کېدو هوډ نه لري او تر اوسه يې د ټاکنو په کمېسيون کې د شته ستونزو د هواري په اړه اقدام نه دی کړی.
دوی وویل چې په اوسنۍ بڼه د ټاکنو ترسره کېدل ورته د منلو نه دي او که یې دولت غوښتنو ته رسېدنه ونه کړي، نو په ټول هېواد کې به د ټاکنو دفترونه وتړي.
خو په عین وخت کي د هېواد د ټاکنو د خپلواک کمېسیون مسؤلين د راتلونکو ټاکنو د شفافيت لپاره د پوره چمتووالي ډاډ ورکوي.
د دغه کمېسیون د خدمتونو رئیس عزت الله ارمان ازادی راډیو ته وویل:
"په مرکزي دفتر کې اته سوه کسان کار کوي، تر څو هغه دوه او درې ځله چې خلکو ځانونه ثبت کړي او هغه چې موږ ورته هېڅ تذکره نه ده وېشلې، بلکې سټیکر پرې لیګېدلی، دا ټول موږ پاک او اصلاح کوو، تر هغه چې مو دا کار نه وي کړی، انتخابات امکان نه لري."
ویل کېږي چې د افغانستان د لوی ائتلاف غړو د کندهار ترڅنګ په یو شمېر نورو ولایتونو کې هم د ټاکنو ولایتي دفترونه د اعتراض په توګه تړلي او ګواښ کوي چې که یې غوښتنو ته رسېدنه ونه شي، په نورو مدني حرکتونو به هم لاس پورې کړي.