یونېسف: د وچکالۍ له امله په هرات او بادغیس کې ۱۶۱ ماشومان پلورل شوي
د ماشومانو لپاره د ملګرو ملتونو د وجهي صندوق یا یونېسف ویاندې الیسن پارکر پرون سې شنبه جنیوا کې خبریالانو ته وویل، په افغانستان کې ماشومان له خطرناک وضعیت سره مخ دي.
مېرمن پارکر وايي، د جولای څخه تر اکټوبر پورې سروې کې ښودل شوې دا ماشومان، د دې لپاره چې پلرونه او کورنۍ یې له پورونو ځان خلاص کړي، د چا په نوم شوي، واده شوي او یا پلورل شوي.
د یونېسف دې ویاندې خبریالانو ته وویل، له بده مرغه ماشومان اوس په مالي تضمین بدلېږي.
د یونېسف پهدې سروې کې چې یوازې په هرات او بادغیس ولایتونو متمرکزه ده، ښودل شوي چې د پلرونو د پورونو پهدې قرباني ماشومانو کې تازه زېږېدلې نجونې نامزاد شوي، تر ۱۱ کلنۍ کم عمره واده شوي او د شپږ هلکانو په شمول یو شمېر د پیسو په بدل کې پلورل شوي دي.
د ملګرو ملتونو د کډوالو ادارې هم ویلي چې افغانستان په لسیزو کې تر ټولو له سختې وچکالۍ سره مخ دی او له جګړې سره یوځای یې پهدې هېواد کې ګڼ شمېر کورنۍ له ناوړه وضعیت سره مخ کړي چې یوازې په روان میلادي کال کې تر ۳۰۰ زرو زیات بېکوره شوي دي.