د اړیکو پیاوړتیا لپاره یو امریکايی پلاوی تاجکستان ته سفر کوي
د جنوبي او منځنۍ اسیا په چارو کې د امریکا د بهرنیو چارو وزارت سرپرسته مرستیاله الیس ویلز به د جنورۍ په ۶مه او ۷مه په پلازمېنې دوشنبې کې وي. دا خبره د امریکا د بهرنیو چارو وزارت په یو بیان کې کړې ده.
د امریکا د بهرنیو چارو وزارت په وینا له تاجکستاني چارواکو سره به د نوموړې خبرې "د سیمه ییزې امنیتي همکارۍ په زیاتولو، د انرژۍ او اقتصادي اتصال پر پراختیا او د دواړو هېوادو د خلکو ترمنځ د اړیکو پر ودې" متمرکزې وي.
دا پلان شوی سفر تر هغې یوه میاشت وروسته کیږي چې د امریکا د بهرنیو چارو وزارت وویل، متحده ایالتونو په ۲۰۱۹ میلادي کال کې د منځنۍ اسیا له پنځو هېوادونو سره دوه اړخیز ډیپلوماټیک تړاوونه زیات کړي دي.
امریکا له منځنۍ اسیا هېوادونو سره د ډیپلوماتیکو تماسونو د زیاتېدو خبر په داسې حال کې کوي چې په منځنۍ اسیا کې د چین سیاسي او اقتصادي نفوذ پر زیاتېدو دی او پر دې هېوادونو فشار راوړي څو د سینکیانګ څخه ورغلي پناه غوښتونکي بېرته چین ته واستوي، هغه څه چې د ټرمپ د ادارې لپاره لویه اندېښنه بلل کیږي.
په عین حال کې امریکا غواړي په افغانستان کې له اتلس کلنې جګړې ووځي.