اسرائیلي استخباراتو په تهران کې د القاعده شبکې یو مشر وژلی
د القاعده دغه مشر عبدالله احمد عبدالله یاد شوی او نوموړی په ۱۹۹۸ میلادي کال کې په افریقا کې د امریکا پر دوو سفارتونو د خونړیو بریدونو په طرحه کولو تورن دی.
نیویارک ټایمز پرون( جمعه د لړم ۲۳مه) راپور ورکړ، عبدالله احمد چې د ابو محمد المصري په نوم هم مشهور و، د تېرې اګسټ میاشتې په ۷مه نیټه ایران کې د دوو موټر سایکل سپرو له خوا وژل شوی دی.
المصري د القاعده شبکې د اوسني مشر ایمن الظواهري د ځای ناستي په توګه یاد شوی دی.
نیویارک ټایمز د استخباراتي سرچینو په حواله لیکلي چې المصري د امریکا په غوښتنه د اسرائیلي استخباراتو له خوا وژل شوی دی.
د ایران د بهرنیو چارو وزارت بیا دغه راپور په کلکه رد کړی او ویلي یې دي چې القاعده شبکې پورې تړلي کسان دغه هېواد کې نشته.