د 'سخاروف' جایزه د بېلاروس د اپوزیسیون مشرې ته ورکول کېږي
دا جایزه دوی ته د هغو خدمتونو لپاره ورکول کېږي چې د فکري ازادۍ په برخه کې یې کړي دي.
تیخانوفسکایا له یوې اوونۍ راهیسې په بروکسل کې د اروپایي ټولنې له مشرانو سره په لیدو کتو بوخته ده، نوموړې ته به د نن ورځې پای کې د یو لړ ځانګړو مراسمو پر مهال دا جایزه ورکړل شي.
د اروپا د پارلمان مشر ډېوېډ ساسولي په تېره اکتوبر میاشته کې ویلي و چې د ۲۰۲۰ کال د سخاروف جایزه د بېلاروس د همغږۍ شورا ته ورکول کېږي.
دا شورا د بېلاروس د مخالفو ګوندونو له خوا جوړه شوې چې دغلته له ټاکنیزو لانجو وروسته د قدرت لېږد ته اسانتیاوې برابرې کړي.
د پنځوس زرو ډالرو په ارزښت سخاروف جایزه له ۱۹۸۸ کال راهیسې هغو کسانو او بنسټونو ته ورکول کېږي چې د بشري حقونو او بنسټیزو ازادیو برخه کې کار کوي.