جرمني دغه هېواد کې د روسیې د استخباراتي فعالیتونو د زیاتېدو خبرداری ورکړ
دا خبره د جرمني د کورني استخباراتو رئیس توماس هیلدینونګ له ویلت ام سونتاګ ورځپانې سره په یوه مرکه کې کړې چې یکشنبه خپره شوې.
هغه ګواښ کړی چې د روسیې دا فعالیتونه د پام وړ مخ په زیاتېدو دي.
توماس هالدینونګ زیاته کړې چې روسیه د جرمني ټولو برخو ته پېچلې استخباراتي لېوالتیا لري.
هغه ویلي روسیه یو ګڼ شمېر اجنټان(جاسوسان) لري چې هڅه کوي له تصمیم نیوونکو خلکو سره رابطه ونیسي.
د جرمني د کورني استخباراتو رئیس په برلین کې ۲۰۱۹ کال د یوه ګرجستاني سړي د وژل کېدو پېښې ته اشاره کړې چې روسان پهکې ښکېل بلل شوي وو.
روسیه تېر ۱۵ کاله د اروپا په ځینو نورو هېوادونو کې هم په ورته هدفي وژنو کې ښکېله بلل شوې ده.
جرمني چې د وګړو او اقتصاد له پلوه د اروپايي ټولنې تر ټولو لوی غړی دی د روسیې په وړاندې د دې ټولنې په اکثرو تګلارو تأثیر لري.
جرمني راروان سپټمبر میاشت ټاکنې ترسره کوي چې په نتیجه کې بهیې تر ۱۶ کلونو وروسته یو نوی صدراعظم ټاکل کېږي.
جرمني ته د روسیې د ګازو د لېږد ۱۱ میلیارد ډالریزه پایپلاین د دې ټاکنو د بحث وړ موضوع ده. دا پروژه له زیاتو مخالفتونو سره مخ ده.
په عین حال کې د جرمني د بهرنیو استخباراتو مشر برونو کاهل خبرداری ورکړی چې د ده په خبره دښمنان له هرې ممکنې لارې د لوېدیځو هېوادونو ترمنځ مخالفتونو ته لمن وهي. هغه چین او روسیې ته په خبرداري وویل چې "یوازې وګورئ چې په موږ باندې خپلې ارادې تحمیلوي".
برونو همداراز زیاته کړه چې اخلاق ډېر بدل شوي، له سختو او بېرحمانه لارو کار اخیستل کېږي او ګټې تر پخوا ډېر په ښکاره توګه لټول کېږي.
روسیې تر اوسه پورې د جرمني د دغو دوو لوړپوړو استخباراتي مشرانو د څرګندونو په تړاو څه غبرګون نهدی ښودلی.
روسیه تر دې مخکې هم د اروپا په یو شمېر هېوادونو له هغې ډلې تازه همدا څو میاشتې دمخه د جرمني ګاونډ چک جمهوریت کې په جاسوسي فعالیتونو تورنه شوې ده.
سږ کال چک جمهوریت د روسیې ۱۸ ډیپلوماټان د جاسوسۍ په تور له دغه هېواده وایستل هغه کار چې روسیې هم بېځوابه پرېنښود او دا هېواد یې د امریکا ترڅنګ د غیر دوست هېوادونو په لېست کې واچاوه.