طالبان: د حامد کرزي نړیوال هوايي ډګر به ډېر ژر بېرته د ټولو الوتنو لپاره چمتو شي
طالبان وايي، دوی د دې ډګر د بیا فعالېدو لپاره کار کوي او ډېر ژر به بېرته د ټولو الوتنو لپاره چمتو شي.
په طالبانو کې یوې سرچینې د نوم نهښودلو په شرط ازادي راډیو ته وویل، د حامد کرزي نړیوال هوايي ډګر د پاکېدو چارې بشپړې شوې او د تخنیکو سیستمونو د بیا فعالېدو چارې هم پیل شوې دي.
د دې سرچینې په حواله، د حامد کرزي نړیوال هوايي ډګر د بیا ژر فعالېدو لپاره له قطر هېواد څخه یوه تخنیکي ډله هم تېره ورځ کابل ته راورسېده.
په کابل کې د حامد کرزي هوايي ډګر نه وروستي امریکايي پوځیان د اګسټ میاشتې په ۳۱مه نېټه ووتل چې ورسره په افغانستان کې د امریکا په مشرۍ ۲۰ کلن پوځي مأموریت هم پای ته ورسېد.
امریکايي پوځیانو له وتلو وړاندې په هوايي ډګر کې شته سیستمونه او وسایل ویجاړ کړي وو.
د افغانستان د هوا پېژندنې ادارې له لوري په خپاره شویو راپورونو کې د حامد کرزي نړیوال هوايي ډګر څخه په کلني ډول ۱،۵ ملیون وګړي د نړۍ ګوټ ګوټ ته تګ او راتګ کاوه.
د معلوماتو له مخې له دې ډګر څخه په میاشتني ډول له ۳۰۰ څخه تر ۵۰۰ کورني پروازونه کېدل چې شااوخوا ۵۰۰ زره کسانیې د افغانستان ګوټ ګوټ ته انتقالول.
همداراز په میاشتني ډول شااوخوا ۴۰۰ نړیوال پروازونه کېدل.
د افغانستان د هوا پېژندنې ادارې له لوري د خپاره شويو معلوماتو له مخې په دې هوايي ډګر کې شااوخوا ۷۶۰ امنیتي کمرې نصب شوې وې چې د ټول هوايي ډګر امنیتي وضعیتیې څاره.
دغه هوايي ډګر ۵۷ کاله مخکې جوړ شو چې له تېرو ۲۰ کلونو راهیسې یې په کلني ډول په ملیونونو ډالره عواید د هوايي ټرافیک له لارې ترلاسه کول.
دا په داسې حال کې ده چې له نن څخه شااوخوا دوه نیمې اوونۍ وړاندې طالبانو د کابل په ګډون د افغانستان ډېری ولایتونه ونیول.