د پخواني حکومت ځينو چارواکو په یو بل د فساد بېلابېل تازه تورونه لګولي
په تازه څرګندونو کې د مالیې وزارت پخواني سرپرست وزیر محمد خالد پاينده له تحلیلګرانو شبکې سره په خبرو کې پر یو شمېر افغان چارواکو د فساد تور پورې کړی دی.
ښاغلي پاینده په خپلو خبرو کې ویلي چې افغانستان کې د فساد بڼه په ډلهییزه توګه وه ځکهیې مخنیوی ستونزمن و.
نومړی وايي چې د ننګرهار ګمرک د څېړنو پر مهال په یاد ګمرک کې په پراخه کچه فساد موجود و چې له املهیې د ګمرک رئیس د استعفا غوښتنه وکړه.
ښاغلی پاینده وايي چې د ننګرهار ګمرک رئیس ورته ویلي و چې هره میاشت د ننګرهار والي ضیاء الحق امرخېل ته ۴۰ زره ډالر ورکوي.
د پخواني حکومت دا چارواکی همداراز وايي چې د افغان ځواکونو چې شمېر یې له ۴۰ تر ۵۰ زرو پورې وو میاشتنی امتیاز یې د یو شمېر نظامي قوماندانانو جېب ته لوېده.
د ښاغلي پاینده دا تورونه د ضیاء الحق امرخېل او د ننګرهار ګمرک پخواني رئيس حشمتالله علیزي له کلک غبرګون سره مخ شوي.
ښاغلي علیزي د یو غږ په خپرولو سره ویلي چې ښاغلي پاینده له ده ځینې داسې غوښتنې کړې وې چې له مخې یې نومړی اړ شو چې استعفا وکړي.
ښاغلی عليزی زياتوي: "ما دلته نږدې څلور میاشتې دنده ترسره کړه او اړ شوم چې له خپلې دندې لاس په سر شم او دلیلیې د هغه ځینې غوښتنې وې چې ما نهشوی پوره کولای، هغه په نورو تورونه پورې کړي، خو د خپلې ادارې په اړهیې څه نهدي ویلي. له والي صاحب او نورو یې چې یادونه کړې ټول دروغ دي."
له بل پلوه ضیاء الحق امرخېل بیا پر خپلې ټویټر پاڼې د دې وېډیو په خپرولو سره لیکلي چې د فساد په اړه د ښاغلي پاینده ځینې غوښتنې د دې لامل شوې چې د ننګرهار ګمرک رئيس له دندې استعفا وکړي.
د چارو شنونکي هم په دې باور دي چې پخواني چارواکي په پراخ فساد ککړ وو.
د چارو شنونکی عبدالشکور نیازی ازادي راډیو ته وايي چې د پخواني حکومت سقوط یو غټ لامل د فساد شتون و، په ځانګړې توګه د امنیتي ځواکونو په لیکو کې.
ښاغلی نيازی وايي: "همدا فساد د حکومت د سقوط لامل شو. د ملي امنیت، پولیسو او اردو سرتېري په هغه کچه نهوو چې دوی ویل او که وو هم له ډوډۍ او نورو امتیازاتو یې خپله برخه ترې اخیسته."
د چارو دا شنونکي وايي، تر هغې چې چارواکي په واک کې وو د فساد په اړهیې هېڅ نهویل، خو کله چې له چوکیو ليرې شي بیا د فساد په اړه څرګندونې کوي.