د طالبانو حکومت: بلخ کې مو ۳ داعش وسله وال وژلي
د امنیه قومندانۍ ویاند اصف وزیري نن پنجشنبه ازادي راډیو ته وویل چې دغه پیښه تېره شپه د بلخ ولسوالۍ په چهارسرکه سیمه کې رامنځته شوې ده.
وزیري وایي، وژل شویو کې دوه بهرني اتباع دي چې یو موټر او یوه اندازه وسلې ورڅخه ترلاسه شوي دي.
داعش چې د طالبانو له حکومت سره وسله وال مخالفت کوي، وخت نا وخت د طالبانو او ملکي افغانانو پر اهدافو بریدونه کوي.
تېره اونۍ د کابل په لویدیځ کې پر یوه ورزشي کلپ داعش وسله والو برید وکړ چې د طالبانو د پولیسو د معلوماتو له مخې ۴ تنه په کې ووژل او ۹ نور ټپیان شول.
داعش شاوخوا درې اونۍ وړاندې د پلخمري په امام زمان جومات کې د جمعې لمانځه پر مهال د شوې برید مسولیت هم واخیست.
په هغه برید کې لږ تر لږه ۷ تنه ووژل شول او ۱۷ نور ټپیان شول.