کورمه کې له پروني بريد وروسته خلکو د امنيتي ادارو پر ودانيو بريدونه کړي
د کورمې یوشمېر اوسېدونکو او ځايي خبریالانو د ازادي راډیو مشال څانګې ته وویل، د نومبر پر ۲۲مه پارېدلو خلکو له پاړه چیناره د باندې د احمدزیو او مليخېلو ترمنځ د پوځ امنیتي پوسته سوځولې ده.
دوی وايي چې، ګڼو خلکو په پاړه چنار کې د باب کرم په نوم دروازې ته هم زیان رسولی دی او پهدې ښار کې یې د پاکستاني ملېشو ځینې تاسیسات سوځولي دي.
د کورمې پولیسو او امنیتي چارواکو لا د تاوتریخوالي د پېښو څرګنوالي او د مخنیوي لپاره یې د حکومتي اقداماتو په اړه څه نهدي ویلي.
خو د فرانسې خبري اژانس وايي چې، چارواکو د کورمې ضلعې په مختلفو برخو کې ګرځبندیز لګولی دی او د موبایل ټليفون خدمات یې ځنډولي دي.
د انجمن حسینیه په نوم د شیعهګانو سازمان یو مشر جلال حسین بنګښ د جمعې تر لمانځه مخکې په خطبه کې پر تاوتریخوالي خپګان ښوولی دی او ویلي یې دي چې، شیعهګان ودانیو او زېربنايي تاسیساتو ته د زیان رسولو پېښو سره هيڅ تړاو نهلري.
په همدې حال کې د کورمې په علیزیو او بګن کې وضعیت خورا ترینګلی دی، ځکه چې هلته سنیان او شیعهګان مورچو ته ختلي دي.
د دې وضعیت له وجې په کورمه کې د تګراتګ لارې او کاروباري مرکزونه تړل شوي دي.
په همدې حال کې د نومبر پر ۲۲مه په کراچۍ کې ګڼو شیعهګانو د کورمې حملې پر ضد مظاهره کړې ده.
د مظاهرې ګډونوالو د نومبر ۲۱مې برید وغانده او په لاسونو کې یې لوحې نیولې وې چې، ورباندې د ترهګرۍ او ناامنۍ پر ضد شعارونه لیکل شوي وو.
د نومبر پر ۲۱مه وسلهوالو په کوزه کورمه کې د مسافر لېږدوونکو ګاډو پر قافلې برید وکړ، چې پهکې د چارواکو او ځايي مشرانو په وینا، د وژل شویو شمېر ۵۰ ته رسېدلی دی.
د سیمې پولیسو، ځايي چارواکو او ولسي مشرانو ازادي راډیو مشال څانګې ته ویلي، حمله د نومبر پر ۲۱مه ماسپښین مهال له پېښوره پاړه چینار ته د تلونکو موټرو پر کاروان شوې وه.