Aluştadaki «Hizb ut-Tahrir davası» mabüsiniñ ömür arqadaşına onıñ iştiraki olmadan üküm çıqarıldı – advokat
Advokat Lilâ Gemeciniñ birleşmege haber etkenine köre, müvekkiliniñ imzası olğan mahkeme oturışuvı aqqında habername sahte ola.
«Hasta balanı baqqan qadın iştirak etmese de, mahkeme qarar çıqardı. Qarar endi şikâyet müddeti bitken soñ alındı, advokat müddetniñ ğayrıdan baqılması içün ariza berdi. Oturışuv martnıñ 15-ne qaldırıldı, çünki dava malümatlarında Elvina Useinovanıñ sahte imzası olğan habername bar», – dep aytıla haberde.
Gemeciniñ malümatına köre, mahkeme Qırım poçtasından Useinovanıñ qayd etilgen müddet içinde haber almağanını isbatlağan vesiqalarnı talap etti.
Hatırlatamız, mahkeme vekili bu dava mabüsiniñ apayı Elvina Kantimirovağa qarşı «qadı ya da mahkeme vekiliniñ belgilengen qadı faaliyetiniñ tertibini temin etüv emirlerini yerine ketirmegeni içün» memuriy protokol tizdi.
Mahkeme vekili Kantimirovağa tibbiy maskanı yañlış taqqanını ayttı. Advokatnıñ bildirgenine köre, qadın oña hitap etilgenini birden añlamadı, amma keç oldı, çünki oña qarşı memuriy protokol endi tizilip başladı.
Bu bozuv içün 500 ruble para cezası berile.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.