Балык Бистәсендә мәгариф җитәкчеләре киңәште
(Балык Бистәсе, 6 февраль, «Татар-информ», «Авыл офыклары», Илгиз Җамалиев). Бүген Балык Бистәсе районы Мәдәният йортында Татарстан Республикасы муниципаль районнарының мәгариф бүлекләре начальникларының зональ киңәшмәсе булып узды. Бу турыда район басмасы хәбәр итә.
Ул төп гомуми һәм урта гомуми белем программалары буенча дәүләт йомгаклау аттестациясенә әзерлеккә багышланган иде.
Башта республиканың 14 районыннан килгән кунаклар Балык Бистәсе гимназиясендә «Инженерная республика» проектының, Котлы Бөкәш мәктәбендә «Үсеш ноктасы» мәгариф үзәге проектының тормышка ашыру барышы белән танышты. Гимназиянең сугышчан дан музеенда булдылар, Бөек Җиңүнең 75 еллыгына багышланган күргәзмәләрне карадылар.
«Йолдыз» балалар бакчасында кунакларга «Балалар бакчасы- уңыш территориясе» күргәзмә- презентациясе тәкъдим ителде.
Киңәшмәнең район Мәдәният йортында узган пленар өлешендә мәгариф хезмәткәрләрен район башлыгы Илдар Таҗетдинов сәламләде.
Илсур Һадиуллин 2020 елда дәүләт йомгаклау аттестациясе уздыруга әзерлекнең төп юнәлешләре белән таныштырды. Рәмис Мөҗипов һәм Гөлфия Хәйруллина имтиханнар уздырганда контрольлек итү һәм технологик тәэмин ителеш мәсьәләләре турында чыгыш ясадылар.