Владимир Жаворонков: Covid-19 белән авыручылар кимесә дә, табибларга йөкләнеш кимеми
(Казан, 28 июнь, «Татар-информ», Эвелина Киселёва). Татарстанда коронавирус инфекциясе белән авыручылар саны кими, ләкин медицина персоналына йөкләнеш кимеми. Бу хакта «Татар-информ» мәгълүмат агентлыгында узган матбугат конференциясендә республиканың сәламәтлек саклау министры урынбасары Владимир Жаворонков сөйләде.
«Хәзер хәл җиңеләйде дип әйтә алмыйбыз. Без стабиль режимда эшлибез. Бер атна элек булган йөкләнеш якынча бүген дә саклана», — дип аңлатты ул.
Жаворонков табибларның мәшгульлеген коронавирус белән генә бәяләмәскә һәм бөтен респиратор авыруларны бергә бәяләргә чакырды.
«Сулыш юллары авырулары — бик пластик йөкләнеш. Кайдадыр ул, һичшиксез, кими, кайсыдыр көнне ул бераз күбәя, чөнки мөрәҗәгатьләр саны арта», — дип аңлатты министр урынбасары.