Казанда Татарстан Дәүләт җыр һәм бию ансамбле лидерларының икеләтә юбилее уза
(Казан, 19 февраль, «Татар-информ», Рузилә Мөхәммәтова). Татарстан Республикасы Дәүләт җыр һәм бию ансамбле берьюлы ике юбилей уңаеннан бәйрәм кичәсе уздыра.
Коллектив ансамбльнең баш дирижеры, Татарстанның халык артисты Рәшит Мостафинны һәм ансамбльнең сәнгать җитәкчесе, Татарстанның халык артисты Айрат Хәмитовны юбилейлары белән котлаячак, дип хәбәр итә ансамбльнең матбугат үзәге. Кичә 1 мартта Камал театрында үтә.
Концерт данлыклы «Минзәлә биюе» номеры белән ачыла, ул Рәшит Мостафин оркестровкасында һәм эшкәртүендә куелган. Тамашачыга Рәшит Мостафинның «Казан кызлары биюе» һәм «Кич утыру» номерлары да, аның эшкәртүендә нагайбәк татарларының «Егетләр биюе» тәкъдим ителә.
«Инде 50 елдан артык ансамбльдә эшлим, оркестрның нинди булганын һәм хәзер нинди икәнен чагыштыра алам. Шушы еллар эчендә коллективның профессиональ дәрәҗәсе ничек үсүен күрсәтү теләгем зур», — ди Рәшит Мостафин.
Икенче бүлектә ХХ гасыр башындагы Казан һәм Себер татарларының фольклор-этнографик материалларына нигезләнгән «Туй» музыкаль-хореографик спектакле күрсәтелә. Әлеге хезмәтнең авторы — дәүләт ансамбленең сәнгать җитәкчесе, куючы режиссер, Татарстанның халык артисты Айрат Хәмитов.
«Туй» спектакленең сюжетын эшләү, җыр, музыка һәм инструменталь репертуарны сайлау өчен зур эзләнү эше башкарылган. Автор танылган галимнәрнең, себер татарларының, шул исәптән Александр Ключарев, Җәүдәт Фәйзи, Мәхмүт Нигъмәтҗанов, Фәйзи Йосыповларның фольклор җыентыкларын өйрәнгән, этнографларның, диалектологларның фәнни хезмәтләре караган.
«Мин юбилейны яхшы кәеф белән каршы алам, — ди Айрат Хәмитов. — „Татар җыены“ дигән яңа программа өстендә эшлим. Ул шулай ук тарихи фактларга нигезләнгән, архивлар белән эшләячәкбез. Планнар күп, планнарсыз яши алмыйм».