Чехия Россияне ковид йоктыру экстремаль куркыныч булган илләр исемлегеннән чыгарды
(Казан, 17 август, «Татар-информ»). Чехия Хөкүмәте Россияне коронавирус инфекциясе йоктыру экстремаль куркыныч булган илләр исемлегеннән чыгарды. Республика гражданнарына әлеге дәүләтләргә сәфәр кылу кичектереп булмаган очракларда гына рөхсәт ителә. Бу хакта ТАСС агентлыгы хәбәр итә.
«Алдагы дүшәмбедән, 23 августтан башлап, Россия, Тунис, Һиндстан һ.б. дәүләтләр коронавирус инфекциясе йоктыру экстремаль куркыныч булган илләр исемлегеннән чыгарылды», - диде Чехия сәламәтлек саклау министры Адам Войтех.
Шул ук вакытта, Бразилия, Колумбия, Перу, Непал, Мозамбик, Парагвай һәм Танзания, киресенчә, әлеге исемлеккә кертелде.
Россия бу исемлеккә 1 июльдә кертелгән иде. Бүген Чехиядә пандемия аркасында россиялеләрнең илгә керүе чикләнгән.