Рөстәм Ямалиев Президент Юлламасыннан соң кадрларда үзгәрешләр булыр дип фаразлады
(Казан, 8 октябрь, «Татар-информ», Зилә Мөбәрәкшина). Мәскәү татарлары штабы җитәкчесе Рөстәм Ямалиев фикеренчә, Рөстәм Миңнехановның ТР Дәүләт Советына Юлламасыннан соң кадрларда зур үзгәрешләр булырга мөмкин.
«Рөстәм Миңнехановны кешеләрнең матди торышы, сәламәтлеге борчый. Ул сәнәгать, икътисад өлкәләре турында гына түгел, социаль өлкәне дә кайгырта. Таләпчәнлек коэффициенты артты. Таләпнең тагын да көчлерәк булачагын аңладым», — диде ул «Татар-информ» хәбәрчесенә.
Рөстәм Ямалиев Президент Юлламасында һәр милләткә, шул ук вакытта һәр кешегә мөрәҗәгать иткәнен әйтте. «Рөстәм Миңнехановның Юлламаның һәр җөмләсен уйлап язганы сизелде. Халык Минтимер Шәймиевны „бабай“ дип йөртә, миңа калса, Рөстәм Миңнехановны „әткәй“ дип атарга кирәк. Без аңа кызыллык китермәскә тиеш», — ди ул.