Җәмигъ мәчете төзү өчен Казансу елгасы ярын киңәйтү турында фикер алышу күчерелә
(Казан, 11 март, «Татар-информ»). «Казан» гаилә үзәге янында ясалма җир кишәрлеге булдыру турында җәмәгатьчелекнең фикер алышуы билгесез вакытка күчерелде.
Җәмәгатьчелекнең фикер алышуында «Федераль милек саналган, Татарстан Республикасының Казан шәһәрендә, Куйбышев сусаклагычында урнашкан су объектында ясалма җир кишәрлеге булдыру» проектының әйләнә-тирә мохиткә йогынтысын бәяләүнең башлангыч материалларын тәкъдим итү күздә тотылган иде.
Чараны «Эко М» компаниясе оештырды, материалларны әлеге оешма әзерләгән.
Иҗтимагый фикер алышулар «Мәскәү» мәдәни үзәгендә иртәнге сәгать унда башланырга тиеш иде. Әмма, мэриянең матбугат хезмәте мәгълүматлары буенча, процедура башланып 10 минут үтүгә, мәдәни үзәк бинасына шартлаткыч куелганлыгы турында хәбәр килгән. Барлык катнашучылар да эвакуацияләнгән. Хәбәр ялган булып чыккан, мәгълүмат тиешле чаралар күрү өчен хокук саклау органнарына тапшырылган.
«Игътибар итегез, иҗтимагый фикер алышулар гамәлдән чыгарылмады, ә күчерелде. Фикер алышуның үткәрелү датасы турында өстәмә мәгълүмат бирәчәкбез», — диделәр мэриядә «Татар-информ»га.
Проект 14,2 га мәйданда ясалма җир кишәрлеге ясауны күздә тота. Төзелеш ике этапта узачак. Беренчесендә — Җәмигъ мәчетен төзү өчен 9,9 га, икенчесендә — 4,3 га мәйдан төзеләчәк. Икенче этапта «Казан» гаилә үзәге урнашкан урында Куйбышев сусаклагычының сул як өлешен төзекләндерү күздә тотыла.
«Ясалма җир участогын булдыру территориясе Куйбышев сусаклагычының сул як ярында, Казан шәһәренең Сибгат Хәким урамы янында, төзелештән буш урында урнашкан», — диелә материалларда.