Миңнеханов инвесторлар белән эшләү өчен профессиональ менеджерлар әзерләргә кушты
Татарстанда йөзләп сәнәгать паркы, ике махсус икътисади зона ачылды. Республикада якынча 1,5 мең резидент эшли, алар 57 меңнән артык эш урыны булдырган. Шуңа да карамастан, сәнәгать парклары әлегә 56 процентка гына йөкләнгән, бу бик аз. Бу проблема турында Татарстан Рәисе Рөстәм Миңнеханов Россия эшмәкәрлеге көне уңаеннан бизнес-бергәлек белән очрашуда белдерде.
«Без инфраструктурага зур акчалар керттек, тик... Профессиональ идарәчеләр кирәк. Инвесторлар белән эшләү гади түгел, безгә аларны өйрәтергә, әзерләргә кирәк, башка юл юк. Сәнәгать парклары - яхшы инициатива, әмма аларга йөкләнеш булырга тиеш. Бу безнең кече һәм урта эшмәкәрлекне үстерүдә зур резерв», - диде Рөстәм Миңнеханов.
Республика җитәкчесе сүзләренчә, Татарстанда эшмәкәрлек мохитен үстерү өчен күп эшләр башкарыла, бизнеска административ басымны киметү буенча эш алып барыла. Мисал өчен, 2020 елдан башлап эшмәкәрләрне планнан тыш тикшерү саны җиде тапкырга кимегән.