Миңнеханов кар яву видеосына «Ваня безгә кар китерде» дип язып куйган
Татарстан Рәисе Рөстәм Миңнеханов матур кар яву видеосын интернет кулланучылар белән уртаклашты. Республика җитәкчесе коммуналь хезмәтләр хезмәткәрләренең хәзер эшләре артуын билгеләп үткән.
«Салкын куып җиткәч, Ваня безгә кар алып килде. Ә хезмәткәрләргә эш тә», — дип язган Татарстан Рәисе телеграм-каналында.
Интернет кулланучылар үз комментарийларында кар яву Яңа ел кәефен китерде һәм иң мөһиме, яңгырга әверелмәде, дип билгеләп үткән.
Исегезгә төшерәбез, «Ваня» – Үзәк Европага мул явым-төшем һәм Россиягә аномаль карлар китергән циклон. Берлинның Азат университеты метеорология институты белгечләре циклонның «Ваня» исемен алуын белдергәннәр.