Уку елы башыннан алып ОРВИ симптомнары күзәтелгән 232 укучыны мәктәпкә кертмәгәннәр
Татарстан мәктәпләрендә иртәнге фильтрлар эшләвен дәвам итә, ә ОРВИ симптомнары күзәтелгән укучыларны сыйныфка кертмиләр. Кулланучыларның хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе җитәкчесе урынбасары Любовь Авдонина «Татар-информ» агентлыгында узган матбугат конференциясендә шулай дип белдерде.
«Сентябрьнең беренче һәм икенче атнасында авыру сәбәпле сыйныфка кертелмәгән балалар булмады диярлек. 1 сентябрьдән алып 232 бала дәрескә кертелмәде», - дип искәртте санитар табиб.
Любовь Авдонина билгеләп үткәнчә, укучыларны тән температурасы 36,6 градустан югары һәм ОРВИ симптомнары булса дәресләргә кертмиләр.
Татарстанда көн саен 511 меңгә якын укучыны тикшерәләр. Авыру йоктырган балаларны укудан читләштереп, мәктәп коллективны ОРВИ, грипп һәм коронавирус таралудан саклый. Любовь Авдонина әлеге чараның югары нәтиҗә бирүен билгеләп үтте һәм мондый фильтрларны хезмәт коллективларында да оештырырга тәкъдим итте.