Хамзат Чимаевнинг мағлубиятига нима сабаб бўлгани маълум бўлди...

Хамзат Чимаевнинг акаси Артур Чимаев чечен жангчисининг UFC 328 турнирида Шон Стриклэндга қарши баҳсда нима учун мағлубиятга учраганини тушунтириб берди. Унинг айтишича, асосий муаммо жанг олдидан оғир вазн ташлаш жараёни билан боғлиқ бўлган.

Артур Чимаевнинг таъкидлашича, Хамзат белгиланган вазн меъёрига етиши учун сўнгги 1,2 килограммни ташлаши керак бўлган пайтда организм бунга дош беролмаган. Шу сабаб жамоага бир неча соатлик танаффус берилган, чунки спортчининг соғлиғи жиддий хавф остида қолган.

“Белгиланган меъёрга етиш учун 1,2 кг вазн ташлаш қолганда организм чидай олмади. Бизга соатлаб танаффус беришди, чунки соғлиқ имконият бермаётганди. Лекин якунда барибир меъёрни бажардик”, — деди Артур.

Унинг сўзларига кўра, вазн ташлаш жараёнида организм жуда қаттиқ чарчаган ва бу ҳолат жанг пайтида ҳам ўз таъсирини кўрсатган. Айниқса, иккинчи раундда Чимаевнинг тўлиқ тикланмагани билиниб қолган.

“Жанг пайти — иккинчи раундда организм тикланмагани аниқ бўлди”, — дея қўшимча қилди у.

Артур Чимаев кўпчиликда “нима учун қисқа муддатда шунча вазн ташлашга қарор қилинди?” деган савол туғилаётганини ҳам тушунишини айтди. Унинг тушунтиришича, дастлаб UFC билан келишувга кўра, Хамзат Чимаев Иржи Прохазкага қарши 93 кг вазнда октагонга чиқиши керак бўлган.

Бироқ кейинчалик Чимаевга қўнғироқ қилишиб, Шон Стриклэндга қарши жангни қабул қилиш таклиф қилинган. Хамзат эса бу чақириқдан бош тортмаган ва баҳсга рози бўлган. Натижада у 105 килограммдан 84 килограммга тушишига тўғри келган.

Бу эса жуда катта юклама ҳисобланади. Қисқа вақт ичида 20 килограммдан ортиқ вазн ташлаш ҳар қандай жангчи организми учун жиддий синов. Бундай жараёнда куч, чидам, реакция ва тикланиш даражаси сезиларли пасайиши мумкин.

Артурнинг айтишича, вазн ташлаш пайтида Хамзат деярли ҳушини йўқотган, унга кислород етишмаган. Вазн ўлчаш маросимидан кейин ҳам спортчи бор-йўғи 5-6 килограмм қўша олган. Бу эса организмнинг жанг кунигача тўлиқ тикланишига етарли бўлмаган.

“Очиғи, вазн ташлаш пайти Хамзат деярли ҳушини йўқотди. Кислород етишмади. Вазн ўлчашдан кейин ҳам Хамзат фақат 5-6 килограмм қўша олди”, — деди Артур Чимаев.

Шон Стриклэндга қарши жангда Чимаевнинг одатдаги босими ва жисмоний устунлиги тўлиқ кўринмагани мухлислар эътиборидан четда қолмаганди. Артурнинг изоҳларига қараганда, бунга техник ёки тактик омиллардан кўра, аввало, организмнинг оғир вазн ташлашдан кейин тикланмагани сабаб бўлган.

Бу ҳолат MMAда вазн ташлаш қанчалик хавфли ва ҳал қилувчи омил бўлиши мумкинлигини яна бир бор кўрсатди. Октагонда жанг фақат зарба, кураш ва тактикадан иборат эмас. Баъзан жангчи баҳс бошланишидан олдин — вазн ўлчаш жараёнидаёқ асосий кучини йўқотиб қўяди.