Татарстан предприятиеләре хезмәткәрләрен яңадан укытуга 20 млн сум акча каралган
(Казан, 11 февраль, «Татар-информ», Надежда Гордеева). Татарстанда «Хезмәт җитештерүчәнлеге һәм эш белән тәэмин итүгә ярдәм» илкүләм проектын гамәлгә ашыру барышында предприятие хезмәткәрләрен укытуга быел 20 млн сумнан артык акча каралган. Бу хакта бүген ТР Дәүләт Советының Законлылык һәм хокук тәртибе комитеты утырышында ТР юстиция министрының беренче урынбасары Айнур Галимов хәбәр итте.
Узган, 2019 елда «Хезмәт җитештерүчәнлеген үстерү өчен мәшгульлек һәм хезмәт базарының нәтиҗәлелеген арттыру» федераль проекты буенча республикада предприятие хезмәткәрләренең квалификациясен күтәрү һәм яңадан укыту уздырылды, диде докладчы.
«37 предприятиенең 5 меңгә якын хезмәткәре яңадан укыту һәм квалификация күтәрү курсларын узды. Хезмәткәрләрне укытуны оештыру эш бирүчеләргә персоналны укыту чыгымнарын финанс ягыннан тәэмин итүгә субсидияләр бирү юлы белән гамәлгә ашырылды», – дип аңлатты ул.
Татарстан Республикасы Юстиция министрлыгы «Хезмәт җитештерүчәнлеге һәм халыкны эш белән тәэмин итүгә ярдәм итү» илкүләм проектын гамәлгә ашыруга кураторлык итә. Аның структурасына өч федераль проект керә: «Хезмәт җитештерүчәнлеген үстерү өчен мәшгульлек һәм хезмәт базарының нәтиҗәлелеген арттыру», «Хезмәт җитештерүчәнлеген арттыру буенча системалы чаралар», «Предприятиеләрдә хезмәт җитештерүчәнлеген арттыруга адреслы ярдәм». Аларны гамәлгә ашыру өчен федераль бюджеттан алынган акчаларның гомуми суммасы узган ел 300 млн сумнан артык тәшкил иткән.
2019 ел башыннан Россиядә Россия Федерациясе Президенты Владимир Путинның 2018 елның 7 маендагы указында каралган 12 илкүләм проект гамәлгә ашырыла.