Сәлимгәрәев: Почта хезмәткәрләре, организмдагы кан тамырлары кебек, бөтен илне бәйли
(Казан, 12 июль, «Татар-информ», Арсений Кәримов). Почта хезмәткәрләре зур игътибарга лаек, алар, организмдагы кан тамырлары кебек, кешеләрне бөтен ил буенча бәйли. «Татарстан почтасы» хезмәткәрләрен котлау тантанасында «Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев шул хакта әйтте.
«Без сезне һәрчак яратачакбыз, кәефегезне белергә һәм нәтиҗәле хезмәттәшлек юлларын табарга тырышырбыз. Безнең белән эшләү һәрвакытта да җиңел түгел, әмма без — сезнең беренче фикердәшләр һәм дусларыгыз. Сез күп нәрсәгә лаек, чөнки сез бөтен илне бәйләп торасыз » , — дип искәртте Сәлимгәрәев.
Ул газета, журналлар нәшер итүчеләр һәм почта арасында җылы мөнәсәбәтләрне сакларга кирәк, диде. Шулай ук ул «Татарстан почтасы» хезмәткәрләренә уртак эш өчен рәхмәт белдерде.
Кичә, 11 июльдә, почта хезмәткәрләренең һөнәри бәйрәме билгеләп үтелде. Бәйрәм белән аларны Россия Президенты Владимир Путин котлады, бу хакта «Татар-информ» хәбәр иткән иде.