Россиялик таниқли мутахассис: Ўзбекистон гуруҳда "сюрприз бўлиши" мумкин
2026 йил 11 июндан 19 июлгача АҚШ, Канада ва Мексика стадионларида ўтадиган навбатдаги Жаҳон чемпионати учун қуръа ташланди ва 48 та терма жамоа расман гуруҳларга ажратилди. Ўзбекистон терма жамоаси учун эса ушбу қуръа жиддий синовларни тақдим этди — жамоамиз Криштиану Роналду бошчилик қилаётган Португалия ҳамда Хамес Родригес етакчилик қиладиган Колумбия билан бир гуруҳга тушди.
“К” гуруҳининг тўртинчи иштирокчиси эса плей-оффдан чиқаётган Конго Демократик Республикаси, Янги Каледония ёки Ямайкадан бири бўлиши кутилмоқда. Мундиалга нисбатан қизиқиш кун сайин ортаётган бир пайтда, футбол таҳлилчилари ва мутахассислар ҳам ҳар бир гуруҳнинг вазиятини ўрганиб, баҳоламоқда.
Шу муносабат билан 2006 йили “Пахтакор” ва Ўзбекистон миллий терма жамоаси бош мураббийлигини амалга оширган россиялик таниқли мутахассис Валерий Непомняший ҳам ўз фикрларини билдирди.
Унинг таъкидлашича, ўйинчиларимиз кучли рақибларга қарамай, гуруҳда сюрприз бўлиш имкониятига эга:
— Очиғи, Ўзбекистон ўз гуруҳида фаворит эмас. Бироқ йўқотадиган нарсаси йўқ жамоалар доим эркин, босимсиз ва ишонч билан ўйнайди. Ўзбекистон термаси ҳам ўзини аллақачон намоён қилган. Шунинг учун улардан ҳар қандай кутилмаган натижа ҳам чиқиши мумкин. Менимча, тўртинчи рақиб қайси мамлакат бўлишидан қатъи назар, Ўзбекистонда уни енгиш учун етарли имконият бор, — дея таъкидлади мутахассис.
Маълумки, бу сафар терма жамоамизни мундиалга тайёрлаётган мураббий — футболчиллик даврида Жаҳон чемпионати совриндори ва “Олтин тўп” соҳиби бўлган италиялик Фабио Каннаваро. Унинг ўзи ҳам жамоани маҳорат, жисмоний тайёргарлик ва тактик жиҳатдан янги босқичга кўтариш устида ишлаяпти.
Ўзбекистон миллий терма жамоаси тарихидаги илк жаҳон чемпионатидаги дебют ўйин 18 июнь куни Колумбияга қарши бўлиб ўтади. Бу беллашув гуруҳдаги энг муҳим учрашувлардан бири сифатида кўрилаяпти.
Шунингдек, жамоамиз 23 июнь куни Португалияга қарши майдонга тушади. Мазкур ўйин ҳам катта қизиқиш уйғотиши турган гап — чунки Роналду бошчилигидаги таркибга қарши ўйнаш ҳар бир футболчининг орзуси.
Гуруҳ босқичидаги сўнгги баҳс эса 27 июнда плей-оффдан ўтган жамоага қарши ўтказилади.
Умуман олганда, Ўзбекистон олдида жиддий синовлар турибди, бироқ амбиция, иштиёқ ва кучли тайёргарлик билан жамоамиз тарихий сюрпризни амалга ошириш имкониятига эга.