Баймак районында мазутлы чокырга егылып төшкән кызларның берсе үлгән
Башкортстанда элеккеге котельная территориясендә мазутлы чокырга егылып төшкән хатын-кызларның берсе үлгән. Хәзер прокуратура тикшерү башлаган. Бу турыда «Башинформ» яза.
Фаҗига 2 декабрьдә иртәнге 5ләр тирәсендә Баймак районының Ургаза авылында була. Өч хатын-кыз машинада өйләренә кайтып бара. Шул вакытта алар ташландык котельная территориясен карап чыгарга уйлый. Шунда керәләр, машина калкурак урынга килеп терәлә. Хатын-кызлар, ни булганын карарга дип, салоннан чыга.
«Иртәнге эңгер-меңгер вакытында алар мазутлы чокырны абайламый калган, ике хатын-кыз 2,5 метр биеклектән чокырга егылып төшкән. Өченче хатын-кыз 112 номерына шалтыраткан», – дип хәбәр итте «Башинформ».
Аларны чокырдан коткаручылар чыгара. Берсе бик нык туңган була. Икенчесе тулысынча мазутка буялып беткән, аны коткара алмыйлар – ул бераздан үлә.
Хәзер котельная объекты хуҗаларын һәм милек өчен җаваплы кешеләрне ачыклау эшләре бара, диелә ведомство хәбәрендә.